我都明白香港人好繁忙,能夠抽幾日出嚟去下旅行真係好奢侈。所以好多人都寧願跟團,唔駛煩吖嘛!
俾咗錢,乜都包晒,只需要上車落車,影幾張相,買些少手信返嚟交差就搞掂。
不過全程走馬看花,去到景點影張「到此一遊」,
但係對該景點嘅歷史背景完全一無所知,只係為咗去旅行而去旅行,似乎有違去旅行嘅意義。
雖然自己以前都係咁,記得跟團嘅時候,去到景點,導遊總要講一大堆「故事」,我就一定走咗去周圍影相。
梗係啦!時間緊迫,可能一生人只係嚟呢個景點一次,影唔到相點得架!
相信大家可能同我嘅諗法一樣,但係事後回想返,平日喺香港嘅生活已經好急速,
去旅行嗰幾日仲急過喺香港?有冇搞錯!
可能我比較幸運,一年可以去幾次旅行
(其實只係大家嘅價值觀唔同啫!有人會用晒d錢嚟買名牌、有人見新手機推出就即刻換機等,我只係花多d錢去旅行啫),
所以有d地方去唔到都唔會太介意,因為應該有機會再去嘅!
慢慢就唔鍾意跟團,特別係第一次自遊行之後,先發覺原來旅行可以咁悠閒
(當然我都仲會跟團嘅!有d地方確實比較危險,或者景點與景點之間太遠,跟團真係方便好多)。
我覺得每次去旅行嘅目的都可以唔一樣,唔會次次都淨係觀光,有時真係要放個假,去其他地方hea下。
成日見d外國人去旅行一定帶本書去,喺酒店泳池就係咁「攤」喺度睇書,咁就一日,佢地真係享受緊自己嘅假期。
而家我去曼谷都唔會特別編行程(最多都只係編下邊日做spa,因為要事前book定),
因為明知係去hea,係去叉電,完全唔趕,我相信呢d先係旅行。
去到外國,當然唔少得觀光,但係我地就只係影張相,完全唔會去考究箇中嘅特別。
雖然有時自遊行,言語不通,又冇人幫手翻譯,想深入了解係有一定嘅難度。
不過編行程嘅時候,要搵好多資料,咁就乘機望一望,起碼都知少少啦!
今次行程之中,有個畫面好深刻,就係喺根室,睇完車石之後,去到根室市歷史自然博物館,
其實除咗我地,仲有一對年老嘅夫婦喺度參觀,一個應該係館長嘅伯伯招呼緊佢地,
佢地喺每一件展品前面都停好耐,雖然唔知佢地講乜,但係佢地指手劃腳,
又不時發出驚嘆嘅聲音,應該係館長伯伯講解緊各樣展品嘅「故事」。
嗰d展品全部都好有歷史價值,要了解當地嘅文化,「聽故事」就係一個好好嘅方法。
而令我愛上自遊行嘅主要原因,就係我可以近距離同當地人接觸,
特別係每次住民宿或青年旅舍嘅時候,都可以有多d時間同當地人傾計,
雖然唔係好深入嘅了解,不過都可以略知一二。
例如喺屈斜路湖認識嘅中川老師咁,原來日本嘅老師都唔想俾人知道佢地嘅身份,哈哈!
又認識到一個識日文嘅法國人、「拋妻棄子」去旅行嘅慎司先生,
仲有帶廣嘅屋台之父久保先生等,呢d就係去旅行應該有嘅有趣體驗。
今個旅程,我都用咗幾個月去plan,少少辛苦啦!
不過其實又好享受當中嘅過程,一路搵資料,就一路加深對當地嘅認識,
實際上只係去咗十五日旅行,不過感覺上就好似去咗幾個月咁,好滿足!
所以大家下次去旅行,不妨做下功課,由編行程開始就好好享受呢個旅程!
最後,特別要多謝老婆!跟團定自遊行其實都冇所謂,同邊個去先最緊要。
難得老婆同我一樣係為食之人,所以全程都一齊食食食,超開心!
而且佢都冇乜問過我個行程係點,我揸車揸到邊,佢就食到邊玩到邊,完全信任我嘅安排。
今次d
yen咁貴,大家都好節制咁唔會亂買嘢,不過老婆又靜靜雞買咗份小禮物俾我,真係好多謝你呀!
d yen越嚟越貴,次次都話唔去日本,要去下其他地方。
不過我地又已經wait緊聖誕去日本嘅機票喇!呵呵呵! |