2011大阪

30/12/2011 (五) 尋日操勞咗一日，所以尋晚大昏迷。今朝成十點幾先起身，好彩去神戶嘅三宮只需半個鐘，都趕得切去ステーキランドKOBE食神戶牛lunch。呢度嘅lunch好抵食，平嘅九百幾至千幾yen，好少少嘅3000yen有找。我地梗係食好少少啦！





呢間嘢做到旺晒，上次嚟都冇咁旺，今次有埋旅行團添！所以d嘢求其咗，d沙律整定晒，沙律醬都雪到乾晒；d蒜片亦炸定晒。好彩d牛都保持到水準。
下一站去睇鉄人28号，由三宮搭幾個站地鐵，去到新長田，一出閘就已經見到好多指示，唔駛驚搵唔到。







新長田有一間大丸百貨(新長田店已結業)，雖然冇乜大牌子，不過唔多人，幾好行。本來諗住上六甲山睇夜景，不過天氣好凍，加上shopping吸引過睇夜景，所以搭返地鐵去三宮行街。三宮有SOGO(已轉為阪急)、0101、OPA等，所以我地嘅收穫都幾豐富。老婆買到幾件衫，我就買到兩頂帽，由於小弟個頭大，喺香港都買唔到啱頭型嘅帽，難得喺日本搵到啱嘅，就買兩頂啦！
日本嘅百貨公司通常20:00收舖，所以我地都行到收舖先去食飯。今晚冇乜特別嘢想食，返酒店放低d嘢，再去多次食串燒。




今次試多幾款嘢食，香蔥雞肉串、燒雞翼、炸雞扒、千島醬洋蔥雞肉串等，各樣都唔錯。今次坐吧枱，見到牆上個鐘好特別，個3字同9字係圈住咗嘅(日文3同9嘅發音同英文嘅Thank You相似)，而且個鐘上面仲有d店員嘅自畫像(其實唔知係自畫，定係人地幫佢畫)，可見店員對舖頭好有歸屬感，而且佢地都好享受佢地嘅工作，真係幸福！
今晚仲有甜品，呢一大碗蛋糕係喺「熊仔」餅店 (其實間舖頭叫Konigs-Krone，不過佢個logo係熊仔，所以叫佢熊仔餅店)買架！呢個係神戶SOGO店限定嘅！呢碗嘢好正呀！底層係布甸，跟住一層蛋糕，一層cream，又一層蛋糕，然後一層吉士，頂層係新鮮生果，每種生果都好鮮甜，超正！