|
經過多次修改，終於都決定用呢個plan，都係要多謝背包d高手俾咗好多意見。
起初一直諗住睇晒兩個祭，就固定咗富良野→小樽，然後睇下其他地方點配合。仲要俾我book到唔係太貴嘅煙花景酒店，梗係唔會諗住改啦！點知其實最唔順路就係嗰兩個地方。好彩討論區嘅高手都俾咗好多意見，而且態度良好，令我仔細咁再睇下個行程，再試下各種路線，睇下邊個方案最好，最後揀咗呢個plan。
其實要「取捨」真係唔容易，「取」梗係唔難啦！所有地方都編晒落去。但係「捨」呢？時間有限，去唔晒咁多地方架喎！去邊d，唔去邊d呢？一心諗住嚟睇祭，梗係去晒富良野同小樽啦！所以頭兩次嘅編排都係固定咗呢兩個地方。直到編極都編唔到，冇理由揸車仲多過去玩架！於是就連富良野同小樽都重新再考慮，原來就係呢度最唔順路。
睇祭一年先得一次，咁睇邊個，唔睇邊個呢？定係兩個都唔睇呢？富良野上次嚟過，不過時間唔啱，已經冇睇到肚臍祭，難得今次喺時間上配合到喎！但係小樽又難得book到煙花景酒店，唔駛喺街同人迫，仲可以舒舒服服，嘆住冷氣，摸住酒杯底，喺房睇煙花。咁點「捨」呢？
只係目光狹窄咁睇住呢兩個地方，梗係「捨」唔到啦！所以我鍾意用地圖嚟編行程，畫好晒箭咀，睇住條路線點行，邊度唔順路，有冇兜圈，一目了然。所以今次忍痛放棄小樽，放棄煙花景酒店。因為都衡量過，去小樽都係睇煙花啫，香港一年都睇幾次啦！近呢幾年都睇到唔想睇。而且小樽又唔難去，總有機會再去嘅，所以今年唔去住。做咗呢個重大嘅決定，之後個行程即刻順晒。亦接納咗背包d高手嘅提議，喺稚內留耐d。
不過始終低估咗自己hea嘅程度，估唔到可以喺余市蒸溜所hea咁耐，搞到之後去唔到積丹岬。
另外，亦低估咗東京嘅情況。由於道北嘅景點唔係好熟，所以花咗好多時間喺道北嘅行程編排度。諗住去過咁多次東京，都係咁上下啦！除咗特別搵咗兩間米芝蓮食肆，都冇再特別編排東京嗰幾日嘅行程。咁就出事喇！內陸機一去到東京，我地就去outlet，不過又冇詳細諗下d交通，雖然羽田近outlet，但係交通其實唔方便，反而搵一日喺新宿搭巴士去會方便好多。之後去Skytree又係，原來喺淺草行去都幾遠，如果編排得好d，就可以舒服d。
食嘢嘅地方不妨搵定多幾間，可能想食嘅餐廳已經結業，咁都仲有d後備選擇。好彩自己都算少少熟悉東京，想去嗰間執咗，都即刻諗到其他地方。 |
