|
去到郊區就租車自駕。自駕嘅過程都算順利，唯一係去完山崎蒸溜所之後唔揸得車，嗰度麻煩咗d。不過都知道咗醉駕問題喺日本都幾嚴重，所以下次安排行程嘅時候，如果要去參觀酒廠，就要避免揸車去。
每次自駕其實都會刻意避開收費高速公路，一嚟都幾貴，每段要三、四千yen；二嚟喺地圖睇，又唔係快好多，話就話高速公路，但係日本嘅高速公路最高速都係80km/h，喺Google
Map計算車程，用高速公路好多時都只係快半個鐘左右，咁俾幾千yen又唔係咁抵，所以次次都係行普通公路。
不過呢幾次自駕，就發現Google
Map嘅問題所在，就係佢唔會計算塞車時間。高速公路通常唔會好塞車，所以計算出嚟嘅時間應該都係差唔多。但係行普通公路，好似只係慢半個鐘左右，但實際上會慢一至兩個鐘，甚至更花時間。
因為普通公路嘅車速一般只係40-50km/h，雖然有時會揸得快d，不過呢種情況唔會經常出現，因為普通公路通常係單線行車，一有警車/大貨車喺前面頂住，想快都冇得快。所以好多時都低估咗車程，就係因為冇計到塞車嘅時間。
可能下次自駕都要考慮埋用收費高速公路。
GPS
喺日本自駕，都係信部GPS架啫！雖然一般情況下，GPS嘅可信度都有99.9%。不過今次經常出錯，其實又唔係出錯，係指示唔清晰。
好多時揸車去到轉彎位，GPS顯示轉彎後就一條路直去。但係我一轉彎，有兩條線喎！一條小路，一條出大路，但係GPS就冇清楚指示轉邊條線。我駛去小路，原來係大路先啱；下次我駛出大路，原來小路先真。都俾佢玩咗幾次，好彩每次都兜得返去「正路」，唔會上咗高速公路唔知去咗邊。所以之前要睇一睇Google
Map嘅路線，大約有個印象。
酒店檢討
東橫inn同新阪急之前都住過，基本上都冇乜問題。其他酒店都係估估下：天橋立嘅仁風莊、近江八幡嘅Hotel
New Omi同埋宇治嘅花やしき浮舟園。今次住呢三間都唔錯，用餐同住房都幾好。
其實都係喺樂天亂咁揀，不過又唔係完全亂揀嘅！都要睇下個地點、飲食、價錢等。
地點最緊要近車站/景點，不過自駕嘅又另計啦！可以住遠少少都得。
飲食方面，通常都係book一泊二食。最緊要睇下夕食(晚餐)食乜，佢都會有幾款夕食俾你揀嘅。我梗係揀d時令嘢啦！
好似去仁風莊，天橋立嗰邊夏天係食蠔嘅，咁梗係揀個有生蠔嘅夕食啦！
去到近江八幡，梗係揀個有近江牛嘅夕食啦！所以住Hotel
New Omi都係因為佢有近江牛鐵板燒。
價錢當然係好緊要嘅因素啦！不過亦係最難取捨嘅！日本人最均真，d嘢係一分錢一分貨。要近車站/景點，俾多d錢啦！要食好d，就貴d啦！所以每次上樂天揀酒店都好傷腦筋，有d真係好正，亦真係好貴，要二、三萬yen一個人。有d幾平嘅，又「冇雷公咁遠」。所以要視乎自己嘅budget，同埋自己嘅取向。
我一般唔會揀太靚嘅酒店，因為通常都玩到「夜媽媽」先返酒店，返到去都係享用佢個廁所同張床架啫，所以無謂住咁貴啦！除非係d特別嘅地方，有靚景嘅，都會揀d貴少少嘅房。好似今次住宇治嘅花やしき浮舟園，都揀咗間河景房。
飲食檢討
今次揀咗幾間米芝蓮嘅餐廳，全部都非常滿意。特別係Fujiya
1935同牛寶，係必食之選。其實Hajime都好出色，不過比較拘束，未必適合匆匆忙忙嘅旅客，不過都值得一試。 |
