寰宇風情

Gundam大晒冷

路線圖

玩九州通常都係順時針或者逆時針方向咁玩，所以都係睇下各個縣有咩好食好玩，再決定路線。

福岡縣

因為飛福岡空港，所以頭尾都一定係stay博多。

1) 屋台

2) Marinoa City

3) 太宰府

4) 門司港

5) 九州鐵道記念館

大分縣

1) 別府地獄

2) 由布院

3) B-Speak

4) 九重夢吊橋

熊本縣

1) 熊本城

2) 馬肉

3) 阿蘇火山

4) Aso Farm Land

長崎縣

1) 平和公園

2) 原爆資料館

3) 軍艦島

佐賀縣

1) 季樂佐賀牛

2) 鳥栖outlet

3) 酒藏

4) 有田

5) 伊萬里

6) 武雄溫泉

7) 嬉野溫泉

宮崎縣

1) 宮崎牛

2) 高千穗峽

3) 高千穗牛

4) 鵜戶神宮

5) 鬼之洗衣板

6) 復活島頭像

7) 霧島酒造

鹿兒島縣

1) 鹿兒島黑豚

2) 砂浴

3) 櫻島火山

4) 屋台

5) 西大山駅

6) 龍宮神社

7) 釜蓋神社

8) 屋久島

就試下順時針方向編排下先啦！

都ok喎！咁就再編埋個行程啦！

方案一：

Day1：香港 → 福岡，宿博多
Day2：博多 → 門司港 → 別府，宿別府
Day3：別府 → 由布院 → 九重夢吊橋 → 阿蘇，宿阿蘇
Day4：阿蘇 → 高千穗 → 宮崎，宿宮崎
Day5：宮崎 → 鹿兒島，宿鹿兒島
Day6：鹿兒島 → 指宿，宿指宿
Day7：指宿 → 屋久島，宿屋久島
Day8：屋久島，宿屋久島
Day9：屋久島 → 鹿兒島 → 熊本，宿熊本
Day10：熊本 → 伊萬里 → 有田 → 長崎，宿長崎
Day11：長崎 → 博多，宿博多
Day12：博多，宿博多
Day13：福岡 → 香港

想去嘅地方大致都編到落行程，不過交通方面就有d棘手。

如果全鐵路，去阿蘇、九重夢吊橋同高千穗都比較麻煩；

如果全自駕，部分車程都好長，而且去屋久島嗰幾日，架車泊邊呢？定係搭汽車渡輪車埋去屋久島呢？

如果鐵路+自駕都ok，咁就：

博多 → 門司港，九重夢吊橋，阿蘇，高千穗 → 博多 (自駕)
博多 → 伊萬里，長崎，由布院，別府 → 博多 (北九州pass)
博多 → 鹿兒島，宮崎 → 博多 (全九州pass)
　

不過去屋久島嘅船期太疏，而且每個景點都要用一整日去，如果只去三日兩夜，似乎太趕。我諗屋久島嘅行程起碼要編五日左右，而且要好好安排，所以今次唯有放棄，留待下次只玩南九州嘅時候再去。

唔去屋久島，咁其他行程就可以鬆動d。

  
方案二：

之前個plan其實冇乜時間留喺博多，而家唔去屋久島，就可以喺博多stay多一兩日。另外，喺有田附近嘅武雄溫泉都好似好值得去，咁就可以喺嗰度stay一晚。

Day1：香港 → 福岡，宿博多
Day2：博多，宿博多
Day3：博多 → 門司港 → 博多，宿博多
Day4：博多 → 太宰府 → 別府 → 由布院，宿由布院
Day5：由布院 → 九重夢吊橋 → 阿蘇，宿阿蘇
Day6：阿蘇 → 高千穗 → 宮崎，宿宮崎
Day7：宮崎 → 指宿，宿指宿
Day8：指宿 → 鹿兒島，宿鹿兒島
Day9：鹿兒島 → 熊本 → 長崎，宿長崎
Day10：長崎 → 有田 → 伊萬里 → 武雄溫泉，宿武雄溫泉
Day11：武雄溫泉 → 博多，宿博多
Day12：博多，宿博多
Day13：福岡 → 香港

不過總係覺得去長崎嗰日好嘥時間，因為Day 9由鹿兒島去到長崎都已經天黑，Day 10只係去軍艦島，然後就離開長崎(其他景點上次已去過)。搭好耐車，但只係去一個景點，仲有可能天氣唔好冇得出海，咁就白去，所以今次都係唔去長崎。

交通方面決定咗前半段自駕，然後由鹿兒島搭特別列車返博多。不過Day 9嗰日有一班特別列車唔開，所以又要執一執個行程。

另外，武雄溫泉附近仲有嬉野溫泉，似乎嬉野溫泉嘅口碑好d喎！咁就改去嬉野溫泉啦！

最終方案：

Day1：香港 → 福岡，宿博多
Day2：博多，宿博多
Day3：博多 → 太宰府 → 別府 → 由布院，宿由布院
Day4：由布院 → 九重夢吊橋 → 阿蘇，宿阿蘇
Day5：阿蘇 → 高千穗 → 宮崎，宿宮崎
Day6：宮崎 → 指宿，宿指宿
Day7：指宿 → 鹿兒島，宿鹿兒島
Day8：鹿兒島 → 博多，宿博多
Day9：博多 → 有田 → 嬉野溫泉，宿嬉野溫泉
Day10：嬉野溫泉 → 伊萬里 → 博多
Day11：博多，宿博多
Day12：博多，宿博多
Day13：福岡 → 香港

Day 8有特別列車，就褪一褪前面嘅行程，stay少一日博多，臨尾幾日先stay返博多。

另外，唔去長崎，咁喺鹿兒島搭特別列車返去就直接返博多，可以放低大件行李，第二日淨係拎個袋仔就可以去嬉野溫泉，咁就方便好多。

旅遊書

好友pizza之前都走咗轉九州，仲買咗本九州書，梗係問佢借啦！

呢本都幾好，介紹得好詳細，d景點、食肆嘅資料都好清晰。最好係細細本，唔太厚，方便攜帶。

交通

今次決定旅程嘅前半段租車，後半段就買pass搭特別列車。

因為前半段去九重夢吊橋，阿蘇同高千穗，呢d地方比較偏遠，搭巴士比較麻煩，所以都係租車方便d。

不過九州嘅鐵路好完善，好方便，仲有好多好有特色嘅列車，唔搭下又唔似去過九州，所以安排尾段就買pass搭火車。

租車

之前租車都係喺Tocoo!度租，比較平。不過今次發現佢個版面轉咗，要申請做會員先可以登入租車，不過又唔接受外國旅客申請。外國旅客要去另一個版面度租車，不過好似比之前貴咗好多。

有friend介紹orix租車都幾平，今次就試下啦！所有嘢都喺網上搞掂，非常方便。

買pass

一直都諗緊買全九州pass，定係北九州pass，因為由鹿兒島返博多應該係要買全九州pass，而且亦包埋搭特別列車，不過就唔可以網上預約車票。

我可以去到九州先買pass，不過到時先訂特別列車嘅車票，就可能冇位。

於是我就網上預約特別列車嘅車票，然後搭到上熊本，咁就可以用北九州pass，唔駛用全九州pass。

仲可以慳返千幾yen。因為3天全九州pass要14400 yen，3天北九州pass要7200 yen，相差7200 yen。我自己預約特別列車嘅車票，都只係5670 yen，點計都抵d。

預約特別列車車票

九州太多特別列車喇！差唔多每條路線都有特別列車。今次預約三班特別列車，分別係：

特急隼人之風

鹿兒島中央 → 吉松

09:25-11:08

伊三郎 新平

吉松 → 人吉

11:49-13:05

SL人吉

人吉 → 熊本

14:38-17:13

喺背包客棧睇下d高手點樣預約車票啦！原來好多人都唔知點搞，唯有自己試啦！

首先要喺JR九州登記做會員，完就可以開始預約。

1) 最簡單就係click「發着駅•日期檢索予約」嗰個制，

  唔好自己輸入駅名，因為有時日文漢字的寫法同中文唔同，打錯咗就搵唔到，好麻煩。

2) 喺地圖揀出發駅同到着駅，揀日期同時間。

3) 系統會選出幾班列車，揀返心目中嘅班次，然後揀座位(頭等/指定席/自由席)。

4) 系統會計算出所需嘅費用。

5) 由於出發前一個月內先可以預約，我係個幾月前預約，所以系統未能即時預約到。

  不過唔緊要，照撳個紅色制，系統會記低d資料，然後到咗一個月前就會自動幫你預約。

6) 揀好人數。

7) 然後揀座席位置，其實唔知揀乜。

8) 再確定一次日期同班次，揀單程/來回/只買特急券。

9) 選擇用邊張信用卡付款(登記做會員時要輸入信用卡資料，因為預約要以信用卡過數)。

10) 預約完成。

11) 三班列車都預約完成。

12) 到咗一個月前，就有email 通知預約情況。

13) 信用卡亦即刻過數。

如果大家心水清，就會發覺小弟book錯嘢！之後再講。

酒店

博多住宿

去開東京，唔係住新宿就係池袋，如果住池袋，就鍾意住the b hotel。b hotel有好多分店，博多就有一間。所以不自覺就以為上次去九州都係住博多嘅b hotel，於是一見到樂天有優惠，就即刻book好晒喺博多嘅住宿。

臨出發前幾日，再check下google map d路線，先發現b hotel距離車站都少遠喎！再check真d，原來上次住近車站嗰間係Sunroute，唔係b hotel。

Oh Shxt！即刻再睇下Sunroute仲有冇房，單一日嘅都有，不過連續住幾日嘅就有d日子冇房，咁都冇得改。再睇下其他近d嘅酒店有冇房，情況都係差唔多。冇辦法啦！都係要住b hotel。

由布院住宿

起初都諗stay由布院定別府，後來都決定stay由布院。因為由布院嘅酒店比較近商店街，咁第二朝就可以早d去B-speak買卷蛋。

由布院有三間旅館合稱御三家，分別係山莊無量塔，玉之湯同埋龜之井別莊。淨係去官方網頁睇相都已經正到暈，價錢亦到好正，一泊二食起碼每人40,000-50,000 yen，暫時唔係我會住嘅旅館。

再睇下旅遊書同網友嘅推介，搵到呢間山紫御泊處 花之舞。環境都唔錯，有私人風呂，最緊要價錢算係相宜一d。

阿蘇住宿

無論睇電視嘅旅遊特輯定係網友嘅介紹，都係講呢條星球村。唔駛諗啦！就做一晚星球人啦！

宮崎住宿

喺宮崎stay嘅時間唔多，加上前前後後都book咗幾間溫泉旅館，要搵返d平靚正嘅商務酒店，首選自然係東橫inn。

指宿住宿

唔駛多講，淨係睇個名都知道一定要住呢間！

指宿溫泉 旅館 吟松

鹿兒島住宿

第二日一早要搭隼人之風，要搵間近車站嘅酒店，自然又係東橫inn啦！

嬉野溫泉住宿

其實對嬉野溫泉完全冇認識，旅遊書同網友嘅資料都唔多，唯有喺樂天逐間搵d酒店嚟睇，另外就喺google map睇下d近巴士站嘅酒店，因為google map可以搵到官方網頁，咁就可以睇得清晰d。

呢間吉田屋就係誤打誤撞咁喺google map搵到，暫時高踞小弟嘅溫泉旅館排行榜no. 1！

飲食

九州有七個縣，各有特色美食：博多明太子、肥腸鍋、佐賀牛、宮崎牛、鹿兒島黑豚、由布院B-Speak卷蛋等，呢d都係必食架啦！

另外，我呢d患上「瘋狂食牛肉症」嘅牛魔王，以嚐盡各種和牛為目標。除咗出名嘅佐賀牛同宮崎牛之外，九州仲有豐後牛、阿蘇赤牛、高千穗牛、伊萬里牛等。

佐賀牛嘅首選自然係季樂本店。

食宮崎牛，就要鳴謝食神KC介紹嘅呢間ミヤチク。

由布院嘅B-speak，唔駛多介紹啦！

其他就一路去一路搵啦！

佐賀牛 季樂本店

宮崎牛 ミヤチク

B-speak

其他

近期大熱嘅用品：自拍神器。

本來應該上網「淘」嘅，會平好多，不過一直都唔得閒搞，到出發前一日先落樓下賣手機殼嘅舖頭買。