曼谷2012


即叫即炸，都好鬆脆。不過就唔可以添飯、添湯同添菜。
坐泰航，d嘢食ok啦！最正係好多嘢飲，雖然係d不知名嘅whisky同埋VSOP，好過冇啦！
飛到曼谷已經十點幾(當地時間)，我地例牌第一時間搶閘過關，可惜等行李差唔多等咗一個鐘！即刻飛的去酒店。





喺我地影緊間房嘅時候，有酒店職員送香檳上嚟！


	原來係旅行社個agent做到嘢！佢幫我地book房嘅時候，除咗例牌request double bed、request non-smoking之外，佢仲request埋honeymoon，所以酒店upgrade咗間房之餘，仲送香檳同朱古力士多啤梨俾我地。 (喺呢度要鄭重聲明，我唔係教大家呃人。我地都係去到酒店先知，唔係我地主動request架！之但係俾咗咁多錢住酒店，而呢d濕星嘢對一間五星級酒店嚟講又唔係咩大數目，都無傷大雅啫！)
1-4-2012 第二日，冇特別安排行程，所以瞓到自然醒先慢慢落去食早餐。


	種類唔算好多，不過樣樣嘢都精緻好味！最緊要有我最愛嘅Eggs Benedict。

			半島個泳池係長條型，分咗幾格，好似幾有型，其實唔係幾好游。
半島有自己種一d香草， d盆栽擺設都好可愛架！
跟住就去林真香唱錢，呢度比一般兌換店兌得高d架！然後慢慢逛過去Siam嗰邊。經過Central World，見佢已經裝修好(2010年紅衫軍示威，呢度慘被燒晒)，當然要入去逛下啦！一入到去就見到好多新嘅食肆，梗係要逐一巡視一下啦！不過行到尾都係覺得第一間最吸引，所以都係要行返轉頭。


熱辣辣，梗係叫兩杯凍飲先啦！香茅青檸凍飲(左) & 菠蘿薄荷沙冰(右)。前者有淡淡嘅香茅味，感覺清爽；後者甜d，沙冰亦透心涼，兩杯都好正！
炸魚鬆伴芒果沙律食泰菜經常會叫嘅一道頭盤，不過通常只有少少脆脆，呢度就大大塊，而且鬆脆可口。芒果沙律好爽脆，加埋d酸酸辣辣嘅汁，非常醒胃。
			呢碗係泰北風味嘅雞肉湯麪。用咗咖喱湯底，香辣惹味。麪係鴛鴦麪，底層係全蛋麪，有咬口；上面放咗炸脆嘅粗麪，增強口感。用咗雞髀肉，嫩滑唔「嚡」口。加埋青檸洋蔥辣椒等配料，好好味呀！
	唔叫太多主菜，因為想試甜品。呢款貌似炸両嘅烚香蕉(左)，香甜軟糯，唔錯。另一款係椰汁石榴子(右)，清涼爽口，大熱天時都係佢吸引d。
食飽飽，去逛街。逛咗一陣Central World個超市，見旁邊都開咗好多新嘅食肆，當然又去搵食啦！
	呢杯榴槤軟雪糕，睇落好似好勁，不過完全冇料到，榴槤味唔夠香，亦冇乜奶香。 59 baht (約15元)，唔抵！

隔離嗰檔puff就堅好多，報稱係日本品牌。個puff全程都係放喺焗爐入面烘住，叫先攞出唧忌廉，所以非常鬆脆。我地揀咗Banoffee (banana + toffee香蕉拖肥)味，香蕉同拖肥真係絕配，又香又甜。而且絕無欺場，d忌廉唧滿成個puff，才35 baht (約9元)，超抵！
逛完Central World，太陽都差唔多落山，極速逛埋去Paragon。
去到Paragon，就見到呢個熟悉嘅品牌，雖然就快食晚飯，不過點都要買一個原味doughnut。因為呢度實在太抵，才27 baht (約7元)一個，買一打仲有優惠，250 baht (約5元一個)。之前喺日本食過，一個doughnut要二、三百yen (約30元)。如果唔係要買芒果糯米飯，一定買一打返去做宵夜。

	另外，喺food court都有好多小食。我地最鍾意食呢d粒粒腸！
晚餐又係必到嘅意大利餐廳Gianni Ristorante。今次個dinner set麻麻地，所以散叫啦！

	頭盤揀咗煎鵝肝，咦？點解得兩件鵝肝嘅？記得之前嚟食有三大件架喎(右圖)！唉！只能慨嘆「物價高漲」也！
	少食多滋味，一人一件，啱啱好啦！老婆嗰件煎得唔錯，我嗰件就略嫌熟咗d，不過依然甘香味美。
Black Truffle Cappuccino 必叫嘅黑松露磨菇湯，黑松露嘅香味濃郁，上面打起嘅一層泡，令個湯更滑。不愧為小弟心目中No. 1嘅湯！
	見隔離枱嗰碟酥炸海鮮幾吸引，即管試下啦！有蝦、魷魚、魚仔、青瓜、茄子......都幾豐富，蝦同魷魚都好爽口，亦炸得鬆脆香口，唔錯！
海鮮墨汁意大利粉上次嚟試過都唔錯，今次就encore啦！墨汁係撈埋落d麪粉度搓成意大利粉，唔係用墨汁嚟煮意粉，所以唔會食到成個咀黑晒！
	Lime Sorbet with Volka 已經飽到唔郁得，都食唔落甜品。不過記得之前食過呢個sorbet，酸味味、凍冰冰，開胃消滯，啱晒！
Petits fours 仲有餐後甜品，老婆只係食咗一粒就投降，小弟唯有燃燒起小宇宙，一口氣消滅埋佢地！
2-4-2012 今日下晝去做SPA，所以朝早可以慢慢嘆個早餐，游下水，然後先出發。
			今次試下杯Cappuccino，不過賣相同味道都唔係好掂！咖啡唔夠香濃，奶泡亦唔夠幼滑。
我地去BTS Asok站附近嘅Divana做SPA，而Asok站隔離就開咗一個新shopping mall─Terminal 21。
			個商場都幾大，有五層，而每一層都以一個國家/城市做主題，大家認唔認得出係邊d國家/城市呢？



	商場嘅五樓係food court，都幾大架！就算撞正lunch hour，都唔難搵位。同其他food court一樣，呢度都係用儲值卡嘅！去買張儲值卡，入幾多錢就自己決定，用剩係可以退錢嘅。拎住張儲值卡去到各個攤檔揀嘢食，揀啱就落order，唔識泰文唔駛驚，有相有編號，用英文講number就可以。 d食物整好咗就俾張卡佢碌，然後攞返張收據，收據有顯示餘額。

我地叫咗豬雜飯、蠔餅同埋魚蛋粉，三樣都好味！而且好平，四十蚊有找。 Divana Massage & Spa (此分店已結業)

	每次嚟曼谷都必定嚟呢度做Spa，因為都算方便，由BTS Asok站行過去都只係五分鐘左右，而家仲有個新商場，食嘢行街仲方便咗。而且價錢合理，3550 baht三個鐘，有磨砂、蒸氣、按摩同浸浴，最緊要係按摩師嘅手勢一流。
次次去到都有d傷腦筋，好多嘢要揀：用咩油按摩啦、用咩嚟磨砂啦、用咩味嘅浴鹽浸浴啦...



	揀好晒就上房，今次間房都幾大，起碼個浴缸夠大，夠晒兩個人浸。之前浸過嘅浴缸(右圖)真係迫咗d。
	做完spa，好舒服！仲可以嘆埋個芒果同香茅茶，超級relax！
Terminal 21(T21)個food court d嘢又平又好味，一於晚餐都喺度搞掂啦！

晏晝試過蠔餅都唔錯！見佢有個鐵板海鮮餅好似仲勁，又試下新嘢啦！不過太油喇，唔掂！第一日嚟到曼谷，食過泰北風味嘅雞肉湯麪，呢度都有喎！不過味道寡d，冇上次嗰間咁有層次。最貴係個海南雞，成100 baht (約25元)，最唔掂亦係佢。雞胸「嚡」都算啦，連雞髀都係「嚡」嘅，真係離晒大譜！
			好彩甜品非常出色，挽回不少分數。杯椰子沙冰雖然唔係好多冰，不過勝在夠清香，消暑一流！ 25 baht (約6元) 榴槤糯米飯更見精彩，榴槤又香又滑，同椰汁糯米飯原來都好夾。 30 baht (約8元)

試埋芒果糯米飯啦！呢度係四色糯米飯，不過都係相同味道，同普通糯米飯係冇分別嘅！個芒果唔係好靚仔，不過都甜！
食完嘢就逛下T21，不過呢度嘅間隔奇奇怪怪，好多巷仔，轉嚟轉去，都唔知邊度行咗，邊度未行。轉轉下俾老婆發現一間賣鱷魚皮手袋嘅舖頭，有d有七折嘅，一萬蚊有找，都唔算太貴(喺香港見到嘅閒閒地都要二、三萬)，不過仲有幾日逛，睇定d先，問下friend先。
跟住見到有殘忍兔(朋友個女幫佢改嘅名)專門店，每年去曼谷都見佢出一隻新嘅，我地每年都有幫襯架！雖然佢個樣幾可愛，不過睇真d個盒，佢都幾暴力架！仲有警告字眼，叫大家唔好將佢同其他公仔放埋一齊！

搭BTS返去Saphan Taksin站，點都要兜過去食碗豬肉粥嘅！20 baht (約5元)


	今晚嘅宵夜尋晚買咗包炸豬皮，於是就去Robinson買兩罐啤酒。經過街邊檔，見到燒腸仔都幾吸引，又買一粒試下啦！
3-4-2012
今朝一早起身，落去睇住日出食早餐。平日梗係冇咁神心啦！今日咁早皆因要遠行。
	雖然plan好咗，不過都仲考慮緊去唔去，因為睇天氣預告，呢幾日都有雷暴。而我地去嘅地方，方圓數百里都冇瓦遮頭，萬一落雨都幾難搞。於是食完早餐，就去問concierge，佢話應該冇問題，而且嗰度都好值得去遊覽一下。既然係咁，幾大就幾大，燒賣就燒賣，出發啦！
河邊嘅酒店其實好近火車站，搭的士都好平。不過我地隔咗條河，都驚條橋塞車(因為差唔多返工時間)，所以我地搭條船過對面河先搭的士，十分鐘左右就到Hua Lamphong火車站。

我地去嘅地方比較少香港人去，所以上網搵資料都有d難度。好彩原來好多台灣人會去，所以喺背包客棧都搵到好多有用嘅資料。不過唯一一樣都係搞唔清楚嘅，就係火車票價。三等車廂，冇冷氣嘅就好清晰，20 baht一個人，超抵！不過環境比較惡劣，就好似大陸火車嘅硬座。如果想慳錢或體驗當地文化嘅，可以一試。二等車廂，有冷氣，價錢就好參差，睇網友嘅分享，由80 baht到300 baht都有，最奇怪就係官方網頁係冇列明價錢嘅！(而家當然有啦) 事後諗返，估計應該係咁：火車站有職員指示遊客去買飛，佢實會叫你去排遊客counter，而嗰格應該係貴d嘅！另外，唔同嘅火車，價錢都有差別。快車，如Special Express或Express係貴d嘅；而慢車，如Ordinary就會平d。
由於要趕火車，所以都冇時間研究排邊格買飛，最終以創出新高嘅價錢， 315 baht (約80元)一個人買咗車飛。 (不過算啦！比起喺日本搭JR，其實呢度都仲係好平)

買完飛，直接行入隔離道門，就已經係月台，搵啱個月台就可以上車。咁咪人人都可以上車？理論上係嘅，不過上到車就會有車長查飛，買錯飛係要補錢架！
			我地就係搭呢架火車，全車得三卡，頭卡就係冷氣車廂。
	冷氣車廂都算乾淨，冷氣亦都夠凍。大部分乘客都係外國人，又係嘅，對外國人嚟講，車票真係唔算貴；不過對當地人嚟講，可能夠佢地食一個禮拜。 State Railway of Thailand →

			途中見到一架好可愛嘅火車，原來係Library Train。
	火車軌旁邊就係一d簡陋嘅民居。
經過一d火車站，發現原來佢地係可以隨時橫過路軌嘅！
			火車開行時，仲要靠車長嘅旗號。
火車行咗大約一個鐘，開始遠離城市嘅建築，取而代之嘅，係一片遼闊嘅草原同埋稻田，亦即係表示差唔多到喇！大約仲有二十分鐘啦！
	講咗咁耐，其實我地去邊呢？答案就係一個叫Ayutthaya大城府嘅地方。泰國嘅「府」就好似中國嘅「省」、美國嘅「州」咁樣，係分區嘅叫法，喺泰國就叫做「府」，不過一般都就咁叫呢度做大城。
大城係泰國歷史嘅重點之一，係昔日大城王朝(1350年至1767年)嘅首都(泰國第二個首都，第一個首都係素可泰Sukhothai)，當時被譽為東南亞最大，甚至被認為是世界上最壯觀的城市。當時嘅皇宮、寺廟同埋佛像嘅雕刻工藝都非常精湛。大城王朝長達417年。到咗16世紀，大城嘅主權、軍事力量、財富同文化，都達到頂峰。當時嘅版圖已擴展到今天嘅老撾、柬埔寨同埋緬甸。國際商貿亦非常頻繁，好多葡萄牙、荷蘭、英國、日本......嘅商家往來經商，今日嘅大城區內仲保留住葡萄牙村、荷蘭村同埋日本村等。後來緬甸入侵，大城王國堅守15個月後，終被征服，而大城嘅宏偉建設幾乎完全被毀，一代王朝終告滅亡。直至達信王(King Taksin the Great)成功趕走緬甸軍，光復國土，成立新王朝，並遷都Thonburi，即今天嘅曼谷對岸。後來拉瑪一世(Rama I)再遷都至曼谷，發展至今。大城位於曼谷北面約86公里，無數雄偉嘅廟宇同壯觀嘅遺址分佈喺城內城外。而位於大城市中心的大城歷史遺跡公園喺1991年被聯合國教科文組織UNESCO列為世界文化遺產，亦係一處令人嘆為觀止嘅名勝古蹟。大城嘅歷史廢墟仍然存在，其中好多已被恢復原狀。大城嘅建築混雜咗高棉同埋早期素可泰嘅獨特風格。由於受到高棉嘅影響，所以有d建築睇起嚟好似吳哥窟。
落咗火車，即刻影低個回程時間表先。嘩！班次都幾疏落喎！比較合適嘅就係15:30，然後就16:07，16:37，之後就要等到18:47，所以得三班車可以揀，咁就預計搭16:07班車啦！不過呢度係冇得預售車票嘅，要開車前廿分鐘先有飛賣。咁就四點前返到嚟火車站啦！

之前已經做好功課，知道點行架喇！一出火車站，過馬路，穿過一d小攤檔，就會去到河邊嘅碼頭，搭船過對面岸，船費每人4 baht。上岸後，行出去會見到個市集，然後就要決定搭咩交通工具。一般有以下幾種選擇： 1) 包Tuk Tuk 約100-150 baht一小時，因應你想去幾多個景點，同埋每個景點大約睇幾耐，而決定包車幾多個鐘。基本上一出火車站已經有好多Tuk Tuk司機兜生意，不過網友話過咗河先搵會平d。至於揀邊個Tuk Tuk司機，就睇你自己嘅心水。 2) 租電單車約300 baht半日，其實幾抵玩，不過就要有國際電單車牌，同埋要識路。 3) 租單車約40 baht一日，不過只能踩去三、四個較集中嘅景點，因為有d景點都好遠，應該踩唔到去。最後我地揀咗包Tuk Tuk，其實都已經有幾個Tuk Tuk司機過嚟兜過生意，不過都唔係好ok(其實個個都差唔多，都唔知點揀，真係睇下合唔合眼緣)，於是入去7-11「過冷河」，順便買d嘢飲。一行出7-11就有個光頭佬過嚟兜生意，又姑且睇下佢咩價錢啦！嘩！200 baht一個鐘，咁貴！我地正想掉頭走嘅時候，佢就話：「No Tuk Tuk，air condition car！」咦！好吸引喎！佢仲話：「come，see the car！」有辦你睇喎！又跟佢去望下架車先啦！
			好新淨喎！有冷氣唔駛熱！正！最後講埋價，700 baht五個鐘，都好抵！
其實唔知去邊度都唔緊要，d司機有晒各個景點嘅明信片，睇啱邊個就去邊個。我當然已經揀好咗要去邊幾個景點啦！不過就唔知點行先順路，所以光頭佬話去邊就邊啦！原來佢叫「阿TA」。去到d景點，阿TA泊好架車喺停車場，然後教我地大約點行，邊度有咩特別嘢睇咁。佢都幾好人，任我地睇幾耐，總之睇完出嚟搵返架車就ok。不過諗真d，咁又係嘅，包咗佢五個鐘，我地睇得耐，佢就可以去少幾個地方(d小人之心又出現)。
	第一站係Wat Yai Chaya Mongkol崖差蒙空寺。 Wat係寺嘅意思，我查返個中文名其實都係照讀音譯。入場費20 baht。我地見d人都係自出自入，門外有個亭有人賣飛，但係入口又冇人收飛。不過才20 baht，算啦！








跟住就去Wat Phanan Choeng帕楠稱寺。呢間寺係紀念鄭和下西洋而修建嘅，又叫三寶公廟。由於正門太擠迫，阿TA車我地去側門落車。


			自從睇過日本漫畫《聖哥傳》之後，每次見到佛像，都不禁會心微笑。其實小弟絕對冇不敬之心，只係佩服日本漫畫家嘅創意同幽默感。 (故事講述耶穌同釋迦牟尼一齊下凡，喺日本生活時發生嘅趣事)


咁多黃布，原來係俾信眾供奉大佛之用。信眾捧住黃布，誠心參拜之後，工作人員就會將黃布一手fing上去佛像上面。
			佛像上面嘅工作人員就將黃布嘅一邊縛喺佛像嘅身上。然後將另一邊扔返俾d信眾。信眾即刻將黃布蓋住自己，然後一齊祈福。

	最後佛像上面嘅工作人員就將d黃布拉返上去，然後縛好喺佛像身上。
	柚木地板大家就見得多，都係細塊細塊咁鋪地板。呢度嘅柚木地板超勁，係一整塊一整塊咁，鋪到好似紅地氈咁。
頭兩站都喺大城城外嘅東南面，跟住就向城內進發。第三站就去Wat Mahathat瑪哈泰寺，呢度都算係大城嘅標示，係必到嘅地方。入場費50 baht。


大城嘅遺跡都幾殘破，好多都好似比薩斜塔咁。可能係磚嘅建築唔夠穩陣，而且舊年嘅大水災，呢度都係重災區之一。





			←d佛像陸續復修緊，呢個算係整得最像真。




我地發現d遺跡入面係磚嘅結構，外面再鋪上灰泥，呢種結構我都明白，興建時方便d，而且喺灰泥上面進行雕刻亦容易好多。但係我地發現d雕刻，又被一層灰泥冚實，好奇怪！


喺荒涼嘅廢墟之中，有一棵充滿生氣嘅奇蹟大榕樹，樹根竟然纏住一個佛像頭。傳說喺打仗嘅時候，寺廟同佛像等遭大肆破壞，好多佛像頭被砍伐，然後賣去外國。咁啱呢個佛像頭被砍伐時，碌咗去榕樹下，榕樹根即刻纏住佢，等人唔可以攞去賣。


咁富傳奇、咁特別嘅景象，已成為大城嘅代表，好多介紹大城嘅書籍都係用佢做封面。泰國人篤信佛教，對佛像尊敬萬分，呢度有個規矩，就係如果要同佛像頭合照，你係唔可以企得高過佛像頭，一定要跪低、踎低或者坐低，以示對佛像頭嘅尊重。離開瑪哈泰寺，都已經一點幾，阿TA問我地駛唔駛食飯，如果要就同佢講。我地又唔會買咩紀念品等佢賺佣，咁去食飯佢都應該有少少佣分到掛，就算冇佣分，都當係俾佢唞下啦！(我地去睇遺跡嗰陣佢咪唞緊囉)
	大熱天時，一支冰凍啤酒真係唔少得。做乜咁可憐，只係炒碟飛天通菜送飯...... 我地當然唔會虐待自己啦！仲有青咖哩雞未嚟啫！
	味道都唔錯！價錢貴少少啦！係香港價錢，喺d咁荒涼嘅遊客區，都合理啦！
又繼續上路，跟住去Wat Phra Si San Phet帕席桑碧寺，呢度曾經係大城嘅皇宮，後來皇宮搬咗去其他地方，呢度先改建成寺廟。





泰國人去到寺廟參拜，都會買一d金箔貼喺佛像上面，希望為d佛像整返個金身。

以前緬甸軍攻打大城，仲喺大城肆意破壞，呢度當然不能倖免，寺廟被燒晒，佛像頭同埋右手被破壞。


	呢三座佛塔建於15世紀，分別擺放住三位大城國王嘅遺骨。其中一座正進行修復嘅工程。
咁啱有班考古學嘅學生喺度進行field trip，大家都好落力咁挖掘。


三座主要佛塔嘅旁邊都有好多小塔，不過日久失修，好多都已經倒塌。




	唔包Tuk Tuk、唔踩單車，仲可以騎大象遊大城。阿TA話等我地嘅時候，有隻雀仔喺樹上跌咗落嚟，佢同其他司機用樽蓋裝咗d水俾佢飲，仲切咗件芒果俾佢食。
今日都好熱，可能係「吽」緊落雨，我地都要買罐可樂休息下。跟住又「屈」邊個呢？係Wat Lokkayasutharam羅卡雅蘇蘭寺，其實都唔知算唔算係一間寺廟，因為已經冇任何建築，只剩返一座巨型臥佛。
		一落車，阿TA就叫我地去睇紀念品，雖然我地唔會買，又即管去望下啦！原來阿TA唔係叫我地睇紀念品，佢係叫我地去睇賣紀念品嗰間屋。間屋都冇咩特別啫！原來條柱上面啡色嗰條線 (箭咀指住嘅地方)，就係上年水災，d洪水浸到嘅高度。嘩！仲高過一個人！

臥佛長28米，高5米，係佛陀涅槃時嘅姿勢，向右側臥，頭枕右手，左手平放左大腿之上，安詳平和。

點解佛像嘅腳板有條界嘅？上面黑炆炆，下面就咁白呢？相信係之前嘅水災，d洪水浸到條界嘅位置，所以界下面就洗乾淨咗。我伸手都掂唔到條界，可想而知d洪水浸到幾高！跟住阿TA見我剔緊張清單，睇下邊d地方去咗，佢就問我仲有咩地方想去，於是我就話去Wat Chai Wattanaram差瓦塔納蘭寺。
			不過因為之前嘅水災，入面唔安全，唔可以入去，只可以喺外圍影相。





呢度嘅建築係參考咗高棉嘅風格，塔群中央係一座高棉式嘅大塔，四周就圍住一d小塔，感覺就好似去咗吳哥窟咁！我編排要去嘅地方都差唔多去晒，只係剩返一個景點，阿TA話嗰度好遠，如果一早同佢講都可以去，而家去唔切。我當然知道啦！不過我諗如果一早去咗嗰度，咁就去唔到咁多地方啦！嗰度留返下次再去啦！阿TA話仲有時間，可以去多一個地方，咁就由佢話事啦！ Wat Phu Khao Thong


	幾經辛苦終於上到去，望住遼闊嘅景色，心情特別舒暢！



我地繞住佛塔參觀嘅時候，發現其中一面有道門，入面有條通道可以去到佛塔嘅中心，原來入面供奉住一尊好靚嘅佛像。

參觀完都差唔多三點，雖然仲有半小時先夠五個鐘，不過都玩夠喇！早d回程，一嚟就當益下阿TA啦！二嚟我地睇下可唔可以搭早一班火車返曼谷。
	去到火車站，梗係同阿TA影張相留念啦！認住佢個樣，下次去到Ayutthaya可以搵佢車你，留埋佢個電話俾大家啦：081-6331345 (我諗佢唔介意嘅)
阿TA叫我地排住隊先，佢就幫我地睇時間，佢話15:30班車ok。於是我地就買15:30嘅air condition train啦！點知票務員話no air condition，full！我地問next train？票務員話this is next train，15:30 will delay hours！咁大鑊！唔理啦！咩位都殺啦！結果買咗next train嘅普通位，每人20 baht。
			原來我地班next train，應該係13:28開，而家15:11都未嚟到，真係...... 阿TA超好人，見我地買好飛，叫我地坐個風扇位慢慢等，佢仲買兩支水俾我地先走。
	咁快就有車？非也！唔係呢個方向，呢邊去清邁嘅！要反方向先啱，而且有車到站，站長會敲鐘嘅！
差唔多等到四點先有車(呢班車應該係13:28開，遲咗兩個半鐘頭)，我地要橫過兩條路軌，去到對面一個用木搭成嘅月台，先可以上車。不過大家趕住上車，都冇時間影低上車時嘅情況。上車記得霸個風扇位，好彩呢班車唔係好多人，環境都唔算惡劣。怕曬嘅仲可以落咗個鋁質「窗簾」，不過唔好落晒，開高少少，有d生風吹入嚟會舒服d。

			大約一個鐘左右就返到曼谷， 20 baht(約5元)坐咁耐，真係超抵！
喺火車站見到部咁型嘅扭蛋機，又幫襯下啦！才10 baht(約2.5元)，原來係變身恐龍蛋。
今晚諗住去唐人街食海鮮，而唐人街就喺火車站附近，行廿分鐘應該可以行到去。
	雖然火車站出面整路，不過問下人，都搵到大約嘅方向。先經過一個細牌坊，然後嚟到呢個大牌坊，應該差唔多到。不過呢度有幾條分岔路，都唔係好肯定行邊條，又問下人啦！
有個「好心」人同我地講，今日唐人街唔開(我記得胡慧沖講過唐人街每星期都有一日唔開，不過唔記得邊日，於是就信咗佢)，佢介紹另一間地道海鮮店俾我地，仲話海鮮店附近有個night market。佢用英文同泰文寫好海鮮店個名，仲「教」我地搭Tuk Tuk。佢話普通Tuk Tuk比較貴，要搭「Government Tuk Tuk」。說時遲，那時快，就有架Tuk Tuk駛過嚟，佢即刻截住佢，就話呢架係「Government Tuk Tuk」。

佢話「Government Tuk Tuk」係黃色車頭，同埋側邊有個logo。佢話普通Tuk Tuk去海鮮店要100 baht，「Government Tuk Tuk」只需50 baht。今日我地舟車勞頓都好攰，諗住有Tuk Tuk車到去門口，唔駛自己搵，就跟佢去啦！
	原來都幾遠，計埋塞車，都差唔多要大半個鐘車程。去到呢間Somboondee Seafood Market，門口有晒魚缸，亦擺晒d冰鮮嘅海鮮俾你揀，我地未入去坐低，第一時間睇咗menu先，好多嘢都係時價喎！咁就去門口睇價啦！大肉蟹、大虎蝦、龍蝦等要300-350 baht/100g，炒碟蜆炒碟菜又300 baht，咁咪好貴！加上入面只係得一兩枱外國人，唔對路！危險！速逃！好彩佢地冇落閘放狗！
離開嘅時候見到佢個招牌寫住「建興好酒家」，原來呢度就係傳說中嘅假建興。好彩小弟平日都有勤力做功課，有睇下網友嘅介紹，雖然未去過真建興，不過都知道有假建興喺度混水摸魚。而且小弟食嘢都知價，如果唔係俾佢掠到一頸血，就真係一世英名一朝喪。亦好好彩原來隔離就係BTS Phaya Thai站，搭一個站就返到Siam，諗住去到Siam先搵嘢食啦！不過諗諗下都唔係幾憤氣，咁樣俾人呃。 check返d旅遊資訊，真建興喺National Stadium站，喺Siam轉車，再搭多一個站啫！一於遷怒喺d海鮮身上，今晚食返夠本！出咗National Stadium站，沿住運動場嘅外圍行，跟住轉入d黑炆炆嘅橫街窄巷，行多幾個街口，就見到好大間、好光猛嘅建築，呢度就係「建興酒家」。 (建興嘅英文係Somboon，假建興係Somboondee，多咗個dee，真係「dee你no more」！)

	一開餐就發生血案......
其實小弟好怕出街食蟹，因為怕麻煩，食到污糟邋遢，仲要係有汁嗰d，一向都少食。不過見佢個logo係蟹，應該都唔差，加上網友介紹呢度嘅咖哩炒蟹係No.1嘅，梗係要試啦！我地要碟中嘅，400 baht。一上枱，試下d汁先，用咖哩醬撈埋d蛋一齊煮，令到個汁更「杰」身，好香，唔辣！隻蟹都幾大隻，好厚肉，正！
	燒大頭蝦 d大頭蝦都幾多膏，蝦膏甘香，蝦肉爽甜，原味已經非常出色。想刺激一下味蕾，點埋嗰碗綠色嘅辣汁，更加惹味！細碟四隻375 baht，大碟八隻500 baht，起初驚住食唔晒，叫咗細嘅，後來發覺唔夠喉，想再追加，不過睇下價錢，叫兩碟細嘅咪好唔抵，唯有放棄啦！下次先叫碟大嘅！
炒苦瓜苗喺香港食過番薯苗，呢d苦瓜苗同番薯苗差唔多，唔知係咪同一樣嘢嚟呢？

我地梗係唔會搞到流血咁唔小心啦！流血嘅係呢d螄蚶。其實小弟係潮州人，細個嘅時候見老豆同d阿叔阿伯成日整嚟食，不過佢地話有菌，唔俾細路食，所以當時都係有得睇冇得食，後來大個d，佢地又話買唔到d靚螄蚶，又好少再整。難得喺度有得食，梗係唔放過佢啦！呢度嘅灼螄蚶隻隻肥美飽滿，僅僅灼熟，仍然充滿血水，不過呢d先係精華所在。雖然賣相有d恐怖，不過其實鮮甜無比。螄蚶應該係細隻嘅赤貝，就算唔係同一品種，都應該係近親。只不過赤貝大隻好多，而且日本料理嘅師傅將佢洗乾淨晒，再處理好先上碟，你先唔覺得佢恐怖。所以螄蚶嘅口感同鮮味其實同赤貝一樣！唔知講完之後，大家會唔會連赤貝都唔食呢？非常滿足嘅一餐，加多一樽啤酒，加埋稅，都係1100 baht，300蚊有找！係假建興可能唔夠食一碟蟹。搭返一個站BTS去Siam Paragon，喺超市掃下貨先。

			呢間嘢我地成日都經過，成日都人山人海，不過都冇諗去試。今晚食飽飯，爭個甜品，於是走去望下啦！原來一杯芭菲才109 baht(約25元)，咁抵！難怪經常都冇位啦！
4-4-2012 尋日咁艱辛，所以今日都book咗去做SPA。食完早餐，去搵個特別嘅地方食晏。
			其實好耐之前胡慧沖都介紹過，不過唔係太詳細，又冇乜特別留意。直至近來Gourmet KC帶團去曼谷「搵食」，又再介紹呢度，原來好近文華東方酒店，就去試下啦！




其實呢度係一間過百年嘅祖屋，後來屋主將佢改成餐廳。有客飯廳、大圓枱、幾個古老嘅杯櫃、百子櫃、一d佛像裝飾...... 完全係住家飯嘅感覺。

先嚟椰青同啤酒。KC介紹將椰青溝啤酒，不過感覺上冇乜特別。

幾款頭盤都好吸引，就叫個拼盤啦！我地發現呢度雖然係食泰菜嘅，不過其實係新派fusion泰菜至真。拼盤有椰青蒸蛋，其實類似日本嘅茶碗蒸，不過加咗椰青水，味道清新。雖然蛋蒸得唔滑，不過用料十足，唔錯！
			釀蟹蓋熱辣辣，香噴噴！啖啖鮮甜嘅蟹肉，正！
蝦春卷 & 香茅蝦春卷炸得鬆脆！香茅蝦係越南蔗蝦嘅泰國版，以香茅代替咗蔗，少咗d甜味，卻多咗一份清香。點埋d青檸辣汁，酸酸辣辣，非常開胃。
			香橙蝦呢度嘅招牌菜，大蝦好爽口，不過用橙煮汁總係覺得怪怪地，老婆第一時間諗起「司x脫魚肝油」。其實唔係唔好食，只不過以橙入饌始終唔係我杯茶！
紅咖哩雞 & 蒜頭飯咖哩好正，先係香濃嘅椰漿味，然後d辣味先慢慢滲出嚟！蒜頭飯亦好正，未開蓋已經聞到濃郁嘅蒜香，唔撈汁都食幾碗，撈埋咖哩汁，即刻「照鏡」！

			豐富美味嘅午餐， 700 baht，200蚊有找。喺古老大宅食飯，梗係要影幾張懷舊feel嘅相。
今次去呢間The Oasis Spa係blogger介紹嘅，旅遊書同胡慧沖都冇介紹過。








呢間SPA喺BTS Asok站同Phrom Phong站之間，沿大路去到31號巷轉入去，由Phrom Phong站行去約二十分鐘(間SPA係咁寫)。我梗係唔會行去啦！因為佢地有專車接送，只要book嘅時候講明需要接送，佢地就會同你約好時間，喺Phrom Phong站5號出口，下面有間麪包店度等。我今次揀咗熱油按摩 Ayurveda Package，3900 baht 2小時。所以房入面有個罌，d熱油就係裝喺入面，然後慢慢滴落你個額頭度，再幫你按摩，超舒服！幫老婆揀咗 Oasis Pampering，2700 baht 2.5小時。都係一般嘅磨砂、按摩，不過佢臨尾會幫你做facial，啱晒！我見尋日舟車勞頓、風塵僕僕，應該好啱老婆，果然老婆都好滿意！做完SPA，超舒服！職員又車返我地出去，因為想再行下T21，所以請職員車我地去Asok站，一樣冇問題。不過冇乜收穫，於是搭返BTS去Chidlom站，去林真香買埋d手信。其實今朝嚟過一次架喇！諗住買好晒d手信，等佢pack好箱，幫我送返酒店先。點知老闆娘話今日唔出車，要聽日先送貨，我地聽日走喇喎！等唔到佢送去酒店，唯有而家買咗，自己拎返酒店先，然後再出過嚟食嘢啦！林真香隔離就係McCafe，坐低飲杯嘢先。


以前林真香呢度真係一個「死場」，除咗林真香之外都冇其他嘢好逛。而家裝修過下，有個food court，有McCafe，人流都多好多。呢間McCafe嘅環境一流，大量梳化位，有落地大玻璃，睇住街景飲嘢，非常寫意！
	McCafe隔離有間小書店，有d特價書，又睇下執唔執到筍嘢啦！果然俾老婆搵到d好嘢：老鼠記者英文版，雖然只得幾本，不過都只係800 baht，除開每本大約40蚊，店員仲用包書膠幫我地逐本包好，非常周到！
見d手信唔係幾重，可以行埋幾個場先返去。友人話附近嘅Platinum Fashion Mall都有d嘢平靚正，又行過去望下啦！遠望呢幢商場都幾grand，不過行到入去......旺角中心！每層都好多舖頭，每間舖頭都細細間咁，其實有d似批發中心。我地去到都差唔多七點，d舖頭都陸續閂門。本來都諗住走，點知俾老婆發現有一層係賣leathers嘅，極速上去兜個圈啦！果然喺死角位搵到一間賣鱷魚皮手袋嘅舖頭。不過d款冇T21嗰間咁靚，而且價錢標得貴d。靚仔店員見我地望下個價錢就想走，即刻話35% OFF。咦！計下先，價錢都ok喎！再睇下d款先，有d都ok嘅！有幾個鱷魚背脊嘅袋都唔錯，價錢都合理，不過老婆嫌d顏色唔好睇。後尾見到呢個鱷魚肚腩嘅，價錢貴d(梗係啦，鱷魚肚腩滑好多，矜貴好多)，個款都ok，而且黑色都幾好襯，我地梗係話cheaper啦！靚仔店員夠膽死話平多150 baht，我地即刻調頭走啦！咁佢都好醒目，叫我地開個價，我地壓到佢四折啦！最後經過一輪激辯之後，終於半價買咗！

「風吹雞蛋殼，財散人安樂！」既然咁安樂，去搵嘢食慶祝下啦！其實諗住今晚去唐人街食海鮮，所以而家食些少嘢就夠，咁就去Greyhound食雞翼啦！ (雖然香港都開咗，不過中環嗰間完全唔掂，尖沙咀嗰間就未試過，但係都唔諗住去試) 於是慢慢逛去Siam Center。
	沿途經過Central World，咁啱有model行catwalk，kawaii喎！
千辛萬苦，終於行到去Siam Center間Greyhound，諗住可以坐低唞下啦！點知已經過咗last order，只可以飲嘢、食甜品，冇得食雞翼。唉！唯有撤退啦！
返到酒店放低d嘢，稍事休息，又再出發。照舊搭船過河先再搭的士，直達「又話拉」(此乃泰文，Yaowara road，即係唐人街個街名)。

第一時間搵呢檔「笑伯橙汁」先。大部分介紹曼谷唐人街嘅書籍、雜誌、節目等，都有介紹過「笑伯橙汁」，聽講話好好賣，賣晒就收檔，所以見到要買咗先。不過買咗橙汁都唔飲得住，因為要去食海鮮，喺人地檔口自攜飲品好似唔係幾好，加上食海鮮都係啤酒夾d，都係要Singha啤啦！其實喺唐人街食海鮮，主要得兩檔，一檔係T&K，職員係綠色制服；另一檔係Lee & Rut，職員係紅色制服嘅！兩檔就喺一條橫街街口嘅兩邊。見T&K好似多人介紹一d，今次就試綠色先，下次先試紅色。

	最快嚟碟炒菜，炒得夠鑊氣，好味！炸蝦餅好得意，中間有個窿，好似donut咁。蝦餅炸得都算鬆脆，送酒一流。
	今次試烤螄蚶，烤得好乾身，連隻螄蚶都好乾，冇晒d血水，賣相冇咁得人驚，不過就冇晒d鮮甜味。
咖哩炒魷魚想食咖哩，又唔想喺街邊食蟹咁狼狽，好彩呢度有咖哩炒魷魚。魷魚爽口唔韌，啖啖肉，比起食蟹真係方便好多。
	今次醒目喇！叫碟大嘅烤大頭蝦。呢度d大頭蝦仲正過建興喎！隻隻爆膏，啜一啖，成個口腔都充滿蝦膏嘅甘香，好好味！
喺度食海鮮好平，食咗咁多嘢都只係770 baht，200蚊有找。不過呢度就冇冷氣，要睇下大家嘅耐熱程度去到邊個level。

	其實都飽飽地，不過見斜對面咁多人排隊，又去八卦下。原來係烘多士/餐包，啱晒！整件咖央多做飯後甜品先。
今日非常充實，大部分所去嘅地方都係以前未去過嘅！可惜聽日就要返香港喇！要返酒店執行李。(其實係因為仲有宵夜等緊我地)

半島嘅曲奇真係超抵，120 baht有4塊，即係唔駛8蚊一塊。本來都諗住買d返嚟做手信，不過今次呢幾款味都麻麻地，所以冇買到。返到酒店用冰桶雪返凍樽「笑伯橙汁」，味道都唔錯！唔係一般橙汁咁甜到漏，而係好新鮮，好清甜，值得一試。一試係ok嘅，160 baht (約40元)一樽，我唔會再試囉！ 5-4-2012 今日搭兩點機，食埋個早餐就要出機場。

	半島嘅早餐雖然好味，不過款式唔多，食咗五日，都有d悶，唯有請天才小廚師上身，搞搞新意思。

自從上次嚟曼谷學識用蜜糖yogurt伴香蕉，而家一有機會就整嚟食。
前一次嚟曼谷都係住半島，都係搭的士出機場，我記得一出半島，轉個彎就上highway，好快就去到機場。點解今次出咗半島，兜極都未上到highway呢？唔通司機兜路？個司機都好醒目，見我地吟吟噚噚，就話佢英文唔好，唔係好識同我地講。原來佢真係兜路，不過因為平日快d上highway嗰段路好塞車，佢寧願兜遠少少先上highway。佢話過幾日就係泰國新年(係喎，過幾日係潑水節)，加上呢幾日泰皇唔知會去邊(聽唔清楚)，所以泰國其他地方嘅民眾都湧晒嚟曼谷。(係喎！周圍都好塞車！) 佢仲話試過揸一個鐘頭車，只係行咗一公里！佢亦都擔心緊一陣由機場出返嚟唔知要塞幾耐，諗落都幾慘！
平安到達機場，亦順利過關上機。

泰航真係好多嘢飲，今次我飲volka lime，不過冇lime，唯有用七喜代替。嘩！仲有好耐冇見嘅Fido Dido。老婆就飲Gin Tonic。
			泰航嘅飛機餐真係唔錯！
甜品亦有驚喜，原來係Tiramisu，雖然賣相普通，不過好好味。 d cream好滑，手指餅非常濕潤，充滿酒香，正！


			今次嘅收穫都好豐富，除咗上面有介紹嘅之外，仲有呢d。
今次編排嘅行程，自己都覺得好滿意！原來曼谷除咗嚟hea之外，仲有好多新奇刺激嘅地方有待我去發掘。桂河橋呢個名，聽就聽得多，原來喺泰國中部，由曼谷去應該唔係好難，下次可以安排下。今次差d俾人呃(其實都算呃咗，俾佢呃咗d時間同埋少少車費)，好彩最後都仲有些少警覺性，亦都好彩遇到嘅只係小騙徒。可能小弟經常都係遇到d好人，所以對d「好心人」嘅警覺性又降低咗。咁今次都係一次好好嘅經歷，等我記住身在異地(其實喺自己地頭都一樣)，樣樣都要格外留神，始終防人之心不可無。不過又話分兩頭，如果下下都防住人，咁又好冇癮啫！所以都要攞返個平衡，信人係要嘅！不過都要小心分析信唔信得過，一有唔妥就速逃。總之要玩得開心！玩得小心！