伊豆+長野

今次飛羽田空港，凌晨機，去到東京只係朝早六點幾，可以玩足一日。




早餐有粥食，JAL真係正好多，連個餐盆都有暖板暖住d食物，真係細心， d嘢食又好味，貴d都值得。 (都唔知CX點解咁貴？d機又殘又細，d飛機餐又難食。)
喺羽田可以搭Monorail出去，再轉山手線。
去到JR站，即刻搵綠色窗口買pass啦！點知只可以買伊豆Free Q pass，買唔到JR East pass，經過一輪雞同鴨講之後，原來要去池袋嘅綠色窗口先有得買，咁就去池袋先買啦！去到池袋，個站鬼咁大，要搵綠色窗口都幾艱辛，幾難先搵到，又話冇得買，要去西口先有，唯有又去搵啦！點知搵到又未開門，諗住綠色窗口好夜先關門，今晚返嚟先買啦！點知咁就鑄成大錯喇！我地去酒店放低行李，再匯合埋個friend，就出發喇！第一站先去築地，途經築地本願寺。




	見到間酒店有咁大條魚，就知到咗築地啦！
上次食過大和壽司，今次本來想試壽司大，不過排排吓隊發覺唔對路，大和壽司條隊郁得咁快，壽司大呢邊都未郁過，好彩當機立斷，即刻轉隊。我地發現原來大和壽司有兩間舖位，壽司大得一間，所以人流慢好多。結果我地喺大和壽司食完出嚟，仲見到原本排我地前面嘅中東籍男士仍然排緊隊。


下一站汐留
宮崎駿有新動畫上演




行到攰，坐低食件cake，休息吓！日本d cake真係好好味，d cream又香又滑，蛋糕亦好鬆軟。

行行吓見到個龜殼喺地下，好多小朋友都喺上面走嚟走去，點知個龜殼突然間噴水，大家都嚇一嚇，不過都係繼續玩。






	日本d和菓子真係好靚。


加埋個包裝，真係kawaii！

	呢個栗子和菓子真係超好味，而且唔太貴。

鮮搾桃汁	啤酒啫喱，正！
夜晚返新宿食吉烈豬扒，呢間「名代」係小弟喺東京必食之一。


食完嘢返池袋，即刻去綠色窗口買pass啦！點知佢正準備關門，唔係掛！八點左右就關門，唔理咁多，照衝入去買(咁趕急係因為聽朝就要用)，不過人地已經埋好數，唔賣俾我地。又經過一輪雞同鴨講，原來JR East pass唔係普通綠色窗口就買到，要喺幾個指定嘅大站，有View Plaza嘅綠色窗口先有得買。本來諗住聽朝可以一早起程，而家唯有delay啦！

	今次全程都冇食過蜜瓜，因為太貴，所以今次專攻桃。香港賣幾十蚊一個嘅日本桃，而家一百蚊四大個，又甜又多汁。