小弟揀冬天去上海，當然係為咗食好嘢啦！今次可算係“膽固醇之旅”，雖然食得唔係好健康，但一向饞嘴嘅小弟，只要有好嘢食，就唔理咁多，食咗先算。希望以下嘅美食唔會嚇親大家。

　　本來諗住買package自己去，但價錢同跟團差唔多，加上又未去過，唔知邊度有d平旅館，所以今次都係跟團，先視察下環境，下次先自由行。

　　其實小弟跟團同自由行都冇乜分別，都係離團自己去玩，不過最麻煩就係跟車出去時，實要去一去d絲綢工場、珍珠工場，所以都係自己去free　d。

建築

東方明珠電視塔

高468公尺，亞洲最高

世界第三高電視塔

(截至2003年12月)

金茂大廈

金茂大廈高92層，

係上海最高嘅建築物，

世界排第三(截至2003年12月)。

88樓有個觀光層，門票¥ 50。

小弟寧願去87樓嘅九重天酒廊，

一邊飲飲食食，一邊欣賞上海夜景，

爽呀！

南浦大橋

和平飯店

仲有好多設計特別嘅建築物

交通

磁浮列車

耗資數以億計的磁浮列車，其實仲未正式通車，只在星期六、日通行作試車。

咁啱小弟星期日抵達上海，先有幸可以乘搭。

勁似“太空侵略者”隻怪獸嘅指示牌

磁浮列車嘅標誌

車站嘅設計都幾現代化

普通單程票 ¥ 75

流線型嘅車身

時速高達431公里

從駕駛室向外望

靚靚“磁浮小姐”

地鐵

上海嘅地鐵都幾方便，

而且好平，單程 ¥ 2 - 6。

景點

宋慶齡故居

博物館 + 故居

如果唔係冬天落咗葉，

相信站在呢條樹蔭馬路上，

會更有feel

上海水鄉─朱家角

大家唔好誤會，

呢隻小狗唔係朱家角特產，

只係見佢得意，同佢影張相。

朱家角特產係呢d粽，¥ 2一隻，平靚正。

朱家角有條放生橋。

向來有生意頭腦嘅中國人，當然唔會放過呢個賺錢嘅機會啦！

一大堆阿嬸，每人拎住一盤魚叫d遊客買嚟放生，都幾煩 ！

破壞晒水鄉幽靜嘅風情。

新天地

上海嘅蒲點之一，

只可惜小弟嘅美食行程太緊密，

所以只在新天地飲咗杯咖啡就要起行，

差d連相都冇影。

外灘

朝早嘅外灘被煙霞濃罩，灰矇矇的，令人有點失落。

晚間，煙霞散去，加上建築物亮燈後，

展現出上海嘅繁華，黃浦灘嘅夜景果然有睇頭。

南京路

有多間百貨公司、購物廣場、各式上海小食••••••可以話應有盡有，

要掃晒成條街，起碼要行一日。

豫園(城隍廟)

古色古香嘅Starbucks

和平飯店

和平飯店內嘅老年爵士酒吧

樂隊由一班年長嘅爵士樂手組成，

年紀最大嘅鼓手已經八十幾歲，

最後生嘅鋼琴手都成六十幾歲。

佢地經驗豐富，曾到多個國家演出。

呢間酒吧更被評為「世界最佳酒吧」。

美食

吉士酒家

天平路，宋慶齡故居附近

醉膏蟹　¥ 108

以花彫酒醃浸膏蟹，

蟹膏入口煙韌、鮮甜，

酒味唔會太濃，恰到好處，

能帶出蟹膏嘅鮮味，正！

蟹肉就俾酒醃到腍晒，

雖然口感冇咁實在，但一樣好好味，

最厲害就係食完都唔會醉。

紅燒蹄膀

吉士咸雞

以上海拉麵糕點聞名

各式糕點

三鮮豆皮 ¥ 5

由國寶級廚師精製，

每日都大排長龍，一定要試。

蝦蟹麵　¥ 36

卅幾蚊一碗麵實在好貴，

不過大閘蟹唔係時時有得食，

貴d都要試。

揚州飯店

蟹斗 ¥ 30　

把蟹粉及蟹膏炒好，再放回蟹蓋中，賣相別緻，味道不錯。

有人幫你起埋肉，煮好埋，都係三十蚊，抵！

蟹黃湯包 ¥ 8

淨係用飲筒啜d湯，

個皮係唔食嘅，幾串，都係8蚊。

蘇浙匯

上海有5間分店，

以盧灣區呢間嘅門面最金碧輝煌。

蜜汁火肪

唔知大家有冇試過食雲腿唔駛o趙呢？

小弟就第一次食到咁正嘅嘢！

雲腿入口溶化，

配合埋甜甜嘅蜜汁，一d都唔覺得肥膩。

仲有咁精緻嘅蜆殼包，用嚟夾雲腿，

一啖一個，真係回味無窮。

樟茶鴨

鴨肉鮮嫩，帶有濃郁茶香，

不愧為必吃之選。

著名嘅阿娘麵

呢個就係阿娘

營業時間6:30-9:30，11:00-1:00

d麵真係好好食，所以日日都人山人海，

佢地就係用呢d牌仔落order。

(前)黃魚麵 ¥ 11

(後)蝦腰麵 ¥ 12

碗雪菜用嚟撈麵最正

上海老飯店，原名榮順堂

八寶鴨

以糯米、豬肉、栗子、白果等釀入鴨內，

所有材料吸收晒鴨嘅精華，非常惹味。

油爆河蝦

河蝦細細隻，

用油爆得脆卜卜，連殼都食埋，

加上甜甜地嘅豉油汁，用嚟送酒一流！

鴿蛋圓子

其實係湯圓，

不過入面係一啖冰涼嘅糖水，

夏天用嚟消暑就最正！

新光酒家

大閘蟹專門店，梁朝偉同劉嘉玲都係常客

小弟一睇菜牌，都嚇咗一跳，

菜式由百幾至幾百蚊，

心諗：嘩！有冇咁勁呀！

侍應非常醒目，見小弟眉頭稍微一皺，

即刻介紹小弟食套餐，

¥ 940就有晒d招牌菜式，

小弟當然要試下佢有幾巴閉啦！

第一道菜先嚟一碟蟹鉗，

小弟都未嚟得切影相，

侍應已經幫我地將蟹鉗分成兩碗，

仲唔只喎！

然後用醋撈一撈、洗一洗d蟹鉗，

倒咗d醋，再用有薑嘅醋撈勻蟹鉗，

正當小弟埋怨唔食薑，

侍應又識幫小弟隔去d薑，

咁嘅服務態度，去邊度搵呀！

第二道菜係蟹腳炒露筍，

當然侍應又幫我地分成兩碗啦！

不過今次小弟醒目喇！影張相先。

侍應仲提醒小弟唔駛落醋，

咁就食到蟹腳嘅鮮味。

果然蟹腳鮮甜，露筍鮮嫩爽口，

冇得彈！

第三道菜係炒蟹粉，

成碗蟹粉，好似食飯咁。

如果係要吹毛求疵嘅話，

唯一可以彈嘅，就係d蟹粉入面有蟹殼。

跟住就係呢個套餐嘅重頭戲─蟹膏。

呢碟蟹膏，真係勁呀！

小弟自問都食過唔少正嘢，

但見到呢碟蟹膏，雙眼都不禁凸一凸！

金黃嘅蟹膏，入口甘香。

雖然有d“漏”，

但當d蟹膏從牙縫中滲出啖啖甘香，

真係......非筆墨所能形容。

最後仲有蟹粉雲吞同埋蟹粉拌麵，四個人都夠晒食。

小弟都唔知自己咗幾多隻大閘蟹，唔駛自己剝餐懵，

又有侍應服侍，仲唔駛加一，唔收貼士，都係 ¥ 1000有找，真係物超所值。

人一世，物一世，點都要試下。

南翔饅頭店

去到上海，梗係要食小籠包啦！食小籠包就一定要去城隍廟隔離嘅南翔饅頭店。

呢度好串，d小籠包有四種價錢：

1.地下外賣 ¥ 8十六隻；

2.一樓 ¥ 15十六隻；

3.二樓最低消費¥ 25；

4.二樓貴賓廳最低消費¥ 60。

嘩！有真人表演拆蟹粉同包小籠包。

呢籠係“招牌小籠包”¥ 20六隻，其實即係蟹黃小籠包。

絕對真材實料，冇呃你架！

“灌湯蝦丸”¥ 8一粒，蝦丸非常彈牙，入面仲有啖蟹黃湯，幾過癮！

呢度都有“蟹黃湯包”¥ 20一個，

不過呢度d料足好多，包入面滿晒蟹黃，連啖湯都好味d。

去過新光同呢度，我諗都唔駛去揚州飯店。

寧波湯圓

又有真人表演，今次係搓湯圓。

寧波湯圓長長地，形狀同平時圓碌碌的有d唔同，咬落煙煙韌韌，好好味。