|
1/1/2012 (日)
今日要一早起身去搶福袋。喺酒店打開窗簾，望下對面Yodobashi嘅情況，
嘩！後門已經打咗一大個蛇餅，不過呢d係搶Yodobashi福袋嘅，我地嘅目標係樓上boutique嘅福袋。
正門唔算好多人，到咗09:30一開閘，所有「馬匹」即刻衝入去，去到各樓層掃貨。
不過唔駛擔心，小小推撞總會有嘅，但秩序大致良好。 |
|
我地順利去到樓上嘅Global
Work，老婆亦順利買咗一個福袋。
我就喺樓下玩具部買咗盒高達模型，本來對新一輯嘅高達冇乜興趣，
不過呢盒大減價，才200yen(約港幣廿蚊)，就買嚟玩下啦！ |
 |
|
返酒店放低d戰利品，跟住就去心齋橋。
心齋橋嘅Lowrys
Farm開得早d，買完福袋先過去OPA。
喺Lowrys
Farm買福袋期間，遇到一位香港女士一齊買福袋，
sales姐姐話買滿10,000yen可以退稅，咁就啱喇，
我地每人買一個5,000yen嘅福袋，一齊俾錢，啱啱好10,000yen。
不過sales姐姐又話「打咩」喎！原來係要超過10,000yen，即係至少要10,001yen，
唉！嘥氣！搞咗一輪，最後都係自己顧自己。
OPA要十一點先開，仲有時間，去書店行下先。
日本d書真係好精美，不過超貴！行到差唔多時間就向OPA進發。
老婆又有收穫，又買到一個PAGEBOY福袋(不過事後發現d嘢唔係好啱心水)。差唔多喇！又返酒店放低d嘢先，因為要去食元旦大餐。
起初擔心元旦冇嘢好食，所以搵間好少少嘅餐廳，未出發已經用email
book定位先。
呢間就係喺Ritz
Carlton Osaka嘅法國餐廳La
Baie，係連續三年取得大阪米芝蓮一星嘅餐廳，來頭唔細架！ |
 |
 |
 |
|
大阪Ritz
Carlton好有歐陸嘅古典風格，成間酒店都係以木製嘅裝修為主，每個角落都滲透出木材嘅淡淡幽香。
一行入酒店，就令人有一種閒息嘅感覺，好似去咗歐洲一d渺無人煙嘅郊區，
郊區裏面一幢古典幽雅嘅別墅咁，完全唔記得自己其實喺繁囂嘅大阪。
|
 |
 |
 |
|
餐廳嘅佈置貫徹酒店嘅風格，牆邊有個大火爐，美觀得嚟又有實際嘅功能，我地就係坐喺火爐旁邊，好溫暖呀！
|
 |
 |
 |
|
餐具係搵日本名牌Narumi(產品網頁在此)特別訂製嘅！好華麗呀！
|
 |
 |
 |
|
先嚟餐前小食，係雞肝醬多士，同埋西芹mousse。
雞肝醬味道香濃，有d鞋口，因為入面加咗雞肉，增加口感，
多士鬆脆可口，細細舊，一啖食晒，係正宗嘅amuse
bouche。
西芹mousse好幼滑，底下有d新鮮嘅蔬菜粒，味道清新，剛好平衡返濃味嘅雞肝醬多士。
|
 |
 |
 |
|
呢套好似實驗室用具嘅嘢係牛油同鹽，有一點點嘅係香草牛油，另一舊係冇鹽牛油；
後面嗰兩支test
tube係鹽，左邊紅色嘅係辣椒鹽，右邊黑黑地色嘅係薰衣草鹽。
餐包我揀咗牛油餐包同埋紫菜法國麪包。
牛油餐包好鬆軟，紫菜法國麪包好香紫菜味，麪包煙韌有咬口。
試下d牛油先，香草牛油味道較濃，用嚟搽餐包，好味。
鹽要配埋冇鹽牛油一齊食，辣椒鹽好特別，先食到鹹味，然後有d微辣慢慢滲出嚟，刺激味蕾，過癮！
相反，薰衣草鹽就溫柔好多，淡淡嘅薰衣草芳香，夾雜住微微嘅鹹味，我都係鍾意溫柔嘅薰衣草鹽多d。
|
 |
 |
 |
|
頭盤係龍蝦，d泡泡係柚子泡沬，好清香。
舊龍蝦睇落去好似熟晒，其實入面仲係溏心架！
相信係慢煮嘅效果，大廚掌握火候嘅功力已達爐火純青嘅境界。
旁邊嘅係蝦仔，海膽，同埋麥米，其實都好好味，可惜喺龍蝦嘅身邊只能做配角。
|
 |
 |
 |
|
第一主菜係煎鯛魚，魚肉嫩滑唔在講，最勁梗係上面嗰層炸魚鱗啦！
魚鱗唔係分開炸，炸完再放上面，而真係連埋魚肉架！
所以大廚嘅廚藝真係勁，炸到d魚鱗脆卜卜，魚肉又唔會過熟。
墊底嘅南瓜汁香甜，薯仔粉糯味美。
嗰兩片小小嘅生菜更見精彩，原來係漬生菜，醃得啱啱好，入味之餘又唔會太酸，一流！
|
 |
 |
 |
|
第二主菜係燒鹿肉，冬天最時令梗係食野味啦！
鹿肉係用北海道嘅蝦夷鹿，有兩舊鹿背肉，同埋一舊鹿腩肉。
唔好見舊鹿背肉冇乜脂肪，就以為好韌，其實肉質好鬆化。
鹿肉肉味都算濃，不過唔會好似羊肉咁羶。
鹿腩肉有層脂肪，味道更加甘香，不過有d筋，要o趙一輪。
配菜依然出色，係紅菜頭同埋蕪菁，紅菜頭新鮮，冇噏味，蕪菁亦清甜爽脆，番薯蓉甜美香滑。
|
 |
 |
醬汁係黑胡椒汁，
當然唔係茶餐廳嗰種黑椒汁啦！
個黑胡椒汁好香肉汁味，
相信用咗好多肉/骨去熬，
反而唔覺有胡椒味。
嗰d碎碎經理話係辣嘅麪包糠，
用嚟點鹿肉嘅，不過亦唔覺佢辣。 |
|
|
 |
 |
 |
|
跟住就係小甜品。見到呢杯懸浮嘅雪芭，已經叫人興奮！
底層係Earl
Grey啫喱，味道較淡；中間係雲尼拿忌廉，又香又滑又甜；
最頂係野莓雪芭，酸味味，食到咁飽，消滯一流。三層一齊食，味道配合得天衣無縫。
嗰幾粒野莓蛋白脆脆更加係畫龍點睛，為軟滑幼細嘅甜品，增添咗幾分粗獷香脆嘅口感！
|
|
 |
 |
 |
|
大甜品係柿子甜品伴香橙雪芭。
起初仲以為大廚將半個橙挖空，再將橙皮處理過，然後用嚟裝甜品，
點知係自己諗多咗，嗰個兜兜只係用曲奇餅底整嘅！
入面係d橙肉整嘅醬，上面有一舊柿，爽甜到不得了。
d泡泡係柿子泡泡，不過味道唔夠突出。香橙雪芭好清甜，好適合做飯後甜品。
(其實日本冇種橙，所以一d靚嘅橙喺日本係貴價嘅入口生果，通常喺高級嘅料理先會用橙嚟做甜品/飯後果。
不過橙喺香港太普通喇！所以大家都覺得佢唔夠矜貴。
試過喺壽司店食嘢，甜品就係半個橙，隔離枱嘅食客即刻埋怨：
乜得舊橙咁cheap架！若明白大家嘅文化差異，就會減少呢d誤解。)
|
 |
最後嘆埋杯熱咖啡，咖啡亦係高水準之作，附有黃糖棒棒，仲有小蛋糕。
經理更加攞一大樽macaron過嚟，每人夾咗一粒俾我地。
粒macaron好好味，係柚子味macaron，感覺好清新，
為呢餐精彩嘅午餐劃上完美嘅句號。 |
|
其實平日嚟食個lunch都只係6000yen左右，有瑰麗嘅裝潢，貼心嘅服務，仲要有咁高質素嘅食物，
以連續三年取得米芝蓮一星嘅餐廳嚟講，其實真係超值！
因為今日係元旦，所以個lunch貴咗d，不過我都覺得係合理價錢，
有機會去大阪一定要嚟試下，不過要預足夠時間，因為食一餐法國菜起碼都兩個鐘以上。
跟住去outlet，以前去開係叫blossom
outlet嘅，唔知幾時又俾三井收購埋。
搭地鐵去心齋橋，轉長堀鶴見綠地線，去到總站門真南，行去outlet約5分鐘。
今日outlet好多人，因為元旦d百貨公司唔開，所以d人都嚟行outlet，而且d人嚟搶福袋、掃平貨。
我同老婆約好時間地點，就分頭行事。
不過大家都冇乜收穫，其實d嘢都比出面平，不過又唔係平好多，所以又唔係好吸引。
加上老婆唔係好舒服，都冇乜心機行，所以逛咗個圈就走喇！
搭返地鐵去心齋橋，就喺心齋橋食d嘢先返酒店啦！ |
|
老婆應該係冷親，
所以想食d熱嘢暖下個肚，
激安の殿堂隔離就有一蘭拉麪啦！ |
 |
 |
 |
 |
其實尋日喺阪神嘅Antenor餅店
已經買定一條栗子蛋糕，
雪咗一晚都仲好鬆軟，
栗子蓉好香，正！ |
