今次超豪咁揀咗間有私人風呂嘅溫泉酒店,其實都好佩服佢地嘅銷售手法,由於聖誕係旺季,房價貴就預咗啦!
呢間係高級嘅溫泉酒店,普通山景房約30000yen,
俾多二、三千yen就有海景房,即係俾多港幣二、三百蚊啫,冇理由唔俾架!
再俾多幾千yen就有私人風呂喇喎,一場嚟到,冇理由唔試下架!
不過間房喺地下,睇唔到海嘅!再俾多幾千yen,個私人風呂就望到海平線喇!
住高少少都係貴千幾二千yen啫,都俾咗咁貴房價,唔爭在嗰幾百蚊啦!
就係咁,最後我地就豪住咗最高層嘅海景私人風呂房間喇!
有私人風呂嘅房間係應該試下嘅!不過講真,其實唔會好多時間喺房浸囉!
第一,浸溫泉其實唔浸得好耐,你落去大浴池浸都夠皮啦!
第二,兩日一夜嘅住宿,其實唔係好多時間,
你去到酒店check
in起碼都下午兩三點,跟住你又會出咗去遊覽其他景點,
返到酒店又差唔多食飯,食完飯落去浸大浴池,浸完返到房,其實都好攰,又要瞓覺喇!
而且夜晚浸私人風呂係睇唔到海嘅!到第二朝早d起身,先可以浸下個望到海嘅私人風呂。
跟住又要食早餐喇,最多食完返房又浸一陣,之後就要執行李check
out。
所以,除非你好鍾意浸溫泉,可以浸成晚嘅,咁就抵住囉!如果唔係,豪一次都ok嘅!
下次我都未必會book私人風呂嘅房(有優惠當然另計啦!)。
今次嘅行程同預計嘅都差唔多,只係去少咗幾個景點:白浜嘅円月島,六甲山,同埋京都。
不過呢d其實都預計咗嘅,因為喺白浜嘅巴士班次好疏落,所以都預咗有一d景點可能去唔到。
而六甲山亦因為天氣凍(出發前睇天氣,山上係零下幾度),所以放棄(其實係預咗去shopping就真)。
至於京都,都去過幾次,今次plan都係去d
cafe仔hea下,去唔到亦冇所謂。
所以有時plan行程嘅時候,總要有心理準備,實有d偏差嘅!
如果能事前預計到,而有Plan
B,咁梗係最好啦!
不過通常都係意料之外嘅居多,到時到候自己執生,亦係自由行好玩嘅地方。 |