大約一點去到高崎駅,可以搭到13:15嘅長野新幹線去輕井澤。
去到輕井澤,第一時間book埋返東京嘅車票,預計搭19:20嘅長野新幹線返東京。
跟住就去搵locker,竟然咁好彩,喺outlet搵到個大locker,啱啱好塞得入我個31吋大喼。
咦?閂唔到門嘅?原來個locker夠高夠闊,但係唔夠深,啱啱爭少少,俾locker個鎖位頂住咗。
我地嘗試移左移右,擰前擰後(其實都冇乜位郁),搞咗一輪,都唔成功。
老婆去第二度睇下有冇大d嘅locker,我就繼續嘗試。老婆唔喺度睇住,我梗係武力鎮壓啦!
好彩個喼係軟喼,俾我壓壓下真係閂到門喎!
老婆返嚟話搵唔到locker,咁算啦!
夾硬閂埋門鎖住佢,希望隻門唔好爆開啦!
俾個locker玩完一輪都已經兩點,要搵嘢食。
記得outlet中間個水池花園度有花畑牧場,應該有咖哩飯食,就去睇下啦!
點知原來已經轉咗做物產店,唯有去返出面嗰條味之街(之後有擴建工程,味之街已經拆咗)睇下有咩好食啦!
都好,可以經過個locker,檢查過冇事,可以放心shopping。
我地喺味之街來回行咗一次,只係得一間食燒肉嘅,同一間食意粉pizza嘅比較吸引。
兩間都多人食,不過燒肉要等位,意粉pizza唔駛等,同埋衡量過,燒肉要食好耐,都係唔好喇!食意粉pizza啦!
Trattoria Buon
Dale (已結業) |