日文版

中文版

大家可能會問：唔識日文，點睇呀？其實我都唔識日文，不過日文入面有好多漢字，可以從d漢字估到大約嘅意思。同埋有d日文經常出現，睇得多其實都認得，例如「ホテル」，即係酒店嘅意思。

又或者睇下日文嘅五十音，其實好多日文都係拼音拼出嚟，用返「ホテル」做例子，「ホ」個音係(ho)，「テ」個音係(te)，「ル」個音係(lu)，所以「ホテル」即係「ho-te-lu」，hotel嘅意思。不過日文有d特別，就係所有響音(vowels，即係a, e, i, o, u)都要發聲，如果有d字母(主要係英文字啦)冇響音跟尾，日本人就會加個響音落去。例如hotel，英文讀法只有兩個音「ho-tel」，不過日文讀法就係「ho-te-lu」，三個音。

我印象最深刻就係個「milk」字(去日本一定要飲奶，超好味)，我地讀「milk」都係一個音，最多個尾音ka得大聲d啫！有次個日本人問我要唔要「mi-lu-ku」，我估到頭都爆都唔知佢問乜，原來係「milk」。佢地個「mi」發到音，不過「l」同「k」都發唔到音，所以佢地就會加個響音落去，變成「mi-lu-ku」。所以點解我地會覺得日本人d英文唔係好掂，原來同佢地文字嘅發音系統有關。所以我都係咁拼下拼下，大約估到佢地嘅意思。

哈哈！唔好意思，由一個唔識日文嘅人喺度講日文。如有錯漏，請各位高手指正！

路線圖 (詳細版)

睇過d資料，原來我初步定嘅路線，周邊都仲有好多好玩嘅地方：

由大阪去姬路會經過明石大橋，明石大橋係全世界最長嘅吊橋，仲可以俾人上塔頂遊覽。

另外喺天橋立再遠少少有個地方叫伊根町，係一條小小嘅漁村，有d似香港嘅大澳。

由天橋立去長浜嘅途中，會經過舞鶴同埋余吳湖，前者出名食蠔，仲有個ToreTore市場，好似白濱嗰個咁；後者係個景色優美嘅湖，仲有段淒美嘅傳說。

琵琶湖東面嘅地方係當年織田信長嘅根據地，所以彥根同安土都值得一去。

最後就將今次嘅路線修改如下：

大阪 → 舞子 → 姬路 → 竹田城跡 → 天橋立 → 伊根 → 舞鶴 → 余吳湖 → 長浜 →

彥根 → 安土 → 近江八幡 → 大津 → 宇治 → 京都 → 大阪

行程

跟住就編埋d日子喇！今次搭凌晨機，一早就到關西空港，本來可以即刻搭車去姬路，不過撞啱嗰日係大阪天神祭，夜晚有花火大會，所以第一晚(25/7)就stay大阪啦！

第二日去行明石大橋，再去姬路，之後都冇咩附近嘅地方可以stay，第二晚(26/7)就stay喺姬路啦！橫掂姬路有東橫inn，平靚正！

第三日去竹田城跡，再去天橋立，路程頗遠，第三晚(27/7)就stay天橋立啦！

第四日(28/7)要去到琵琶湖，應該stay長浜/彥根/近江八幡(睇下book到邊度嘅酒店)。

第五日(29/7)要去outlet，以我兩公婆嘅戰鬥力，相信都要行一整日，所以都係stay琵琶湖一帶，暫定大津，因為有東橫inn。

第六日去宇治，d人通常即日來回，好少stay宇治。不過諗住睇鵜飼，睇完唔想趕住走，第六晚(30/7)就stay宇治啦！

第七日(31/7)去京都，近來睇d日劇都係關於織田信長嘅，所以都想去比叡山延曆寺睇下。原來延曆寺有間旅館，暫定喺嗰度stay一晚，唔係都會stay喺京都。

第八日都係遊京都，睇下第八晚(1/8)stay京都定係返大阪。

之後第九至十四日(2-7/8)都stay喺大阪，就算去神戶、奈良等，都可以即日來回。

交通

究竟買pass？租車？定係又買pass又租車呢？

其實我玩嘅路線，買Kansai WIDE Area Pass比較抵，四天才7000yen。不過我玩五至六日，四天pass又唔夠用。加上我會去d偏遠嘅地方，冇鐵路，巴士班次又超級疏落，一個鐘頭先得一兩班車，所以都係租車方便d。

喺「郊區」自駕就方便啫！喺市區揸車一定塞到暈，所以唔會全程都租車。暫定喺姬路租車，返到京都就還車，應該租六日車。租車d嘢之前講過，唔喺度多講，有需要就自己重溫啦！

起初睇討論區，d巴打話喺關西空港買Kansai Area Pass (KAP)抵d，一日券2000yen，因為可以搭特急列車出市區，單程2940yen，已經有賺。咁我買兩日券，第二日可以用嚟去舞子同姬路，都唔錯。後來再仔細研究一下，特急列車只停難波，唔停我stay嘅梅田，要再轉車，太麻煩喇！而且搭機場巴士都唔係太貴，單程1500yen，來回2700yen(14日內使用，啱啱好)，去到酒店門口，仲方便。

咁就只係第二日用KAP啦！不過買KAP有d麻煩，一係就喺香港指定嘅旅行社購買換票券，然後去到關西指定嘅綠色窗口換票。一係就上網預約咗先，然後print封確認信出嚟，帶埋護照同回程機票，去指定嘅綠色窗口購買。

之後喺大阪逛，都係買地鐵一日券啦！(800yen，搭四程就返本；星期六、日同假期特價600yen，仲抵！)

好多人覺得日本嘅鐵路好難明，其實又係又唔係啦！難嘅原因係佢太多鐵路公司，以大阪為例，有JR、地鐵、近鐵、阪急電鐵、阪神電車......而且路線又多，淨係地鐵路線都差唔多十隻色，梗係亂啦！

不過又唔係好難明啫！香港人搭慣地鐵，只不過多幾條線，應該問題不大。係轉車時要睇清楚d，因為佢唔係行過對面月台咁簡單，有時要行好遠先轉到車，要睇清楚指示牌，有時喺月台頭或月台尾上錯咗電梯，就已經轉唔到車。

總知我喺大阪地區就只係搭地鐵，去梅田、心齋橋、難波、天王寺、日本橋等，搭地鐵已經ok。而離開大阪，去遠少少嘅地方，如京都、神戶就搭JR啦！去奈良搭JR到得，不過近鐵會方便d，因為奈良d景點近近鐵駅多d。其他鐵路就唔好理啦！

酒店

其實我最鍾意住東橫inn，平靚正！大部分都喺車站隔離，超方便。

可惜喺東京、大阪嘅東橫inn就「冇雷公咁遠」！所以喺大阪我就會住新阪急，有幾好？自己重溫啦！

至於book其他地方嘅酒店，我就會上樂天搵，不過我見好多巴打都鍾意去jalan搵。其實差唔多，不過我覺得樂天好似多d選擇，而且用開就費事轉，同埋儲咗d分，可以用嚟減價。

咁當然我都會兩個網頁一齊睇，格下價，甚至直接上酒店嘅網頁，睇下會唔會有特別優惠，總知以平為主啦！

另外，仲有一個網頁，就係一休.com。其實之前都有睇過呢個網頁，不過選擇唔多，價錢都唔算平，所以一直都冇特別去睇。今次都係睇其他網頁，唔小心link咗過去。原來佢做緊「サマ割」(Summer Sale)，有d酒店同餐廳都半價。