2013大阪

28/7/2013 (日) Day 4 天橋立 → 伊根 → 舞鶴 → 近江八幡

		原來我地間房有個小露台，不過要爬窗先出到去。
另一邊隻窗望到天橋立架！

	今日嘅行程都幾緊密，所以要早d起身食早餐。


食完早餐，出去晨運下先。






	仁風莊嘅背脊。仁風莊喺馬路旁邊，冇位泊車，要喺對面馬路，橫過埋火車軌，先有位泊車。
		有隻好惡嘅黑貓幫我地睇住架車。
揸架車去天橋立睇下。天橋立附近嘅停車場要俾錢，600yen可以泊成日。不過我地只係停低影幾張相，冇理由又俾600yen架！於是揸返走啦！經過天橋立站，見到有個細細嘅停車場，唔理喇！泊咗先啦！
由天橋立站行過去都好近，三兩分鐘就到，中間會經過智恩寺。
		呢度d籤係扇型嘅。喺日本，如果求到支唔係幾好嘅籤，係唔會拎返屋企嘅，會綁起/掛起佢。連中吉都要掛起佢，睇嚟要大吉先算係好籤。


穿過智恩寺，就會出到海邊，仲會見到好多「大飛」。
		喺天橋立成日都會見到呢個智恵の輪(智慧之輪)，不過應該係喺用嚟掛燈籠，以祈求船隻嘅安全。 (可click左圖睇下佢講乜)
	行過d就係迴旋橋，顧名思義條橋係會轉嘅，因為要俾d大隻嘅船通過。不過十一點先有得旋，唔等啦！


過咗迴旋橋就會見到日本三景碑。日本三景分別係天橋立、松島同埋嚴島神社，原來我已經去過兩景，只係未去過嚴島神社。
		真係好佩服d日本人，乜都選得一餐。有瀑布百選、秘境百選、紅葉百選......連有聲音嘅風景都有音風景百選。呢度係日本之道百選之一，都唔係好稀奇啫！想知道仲有咩百選，自己睇啦！



其實可以沿住天橋立一直行過去，中間仲有d景點、泳灘等。不過唔行咁遠喇！原路返去，再次經過智恩寺。

	見老婆定咗鏡咁企喺度，究竟望緊咩呢？又出動50倍zoom睇下先。


附近嘅手信舖頭有棵好茂盛嘅火百合。


車站對面有間手信舖，樓上有生蠔，梗係唔會放過佢啦！不過唔夠仁風莊嗰隻咁肥美。

check out之後，就去傘松公園。之前喺車站嘅觀光中心已經問好晒，傘松公園係唔可以揸車上去，一定要泊喺下面嘅停車場，然後搭吊車上山。不過職員話山腳嘅籠神社都值得去參觀，可以泊車喺籠神社嘅停車場，然後行過去搭吊車，玩完先返去攞車。好！就咁決定！








呢個水琴窟好得意，應該係d水一滴滴咁滴落個井度，不過d聲透過竹筒傳上嚟，好清脆。




喺籠神社嘅後門行出去，有d手信舖，d天橋立餅乾好得意。
轉個彎就見到纜車站，喺左手邊入閘就係搭呢d吊車(櫈)，右手邊入閘就係搭纜車。票價相同，單程320yen，來回640yen。通常都買來回架啦！




	搭幾分鐘就上到去。 ↓指定動作。

		大家覺得似咩呢？
	天橋立呢個名其實係d人覺得倒轉嚟睇嘅時候，就好似有條橋通往天上咁，所以就叫天橋立。亦都有人覺得倒轉嚟睇嘅時候，好似一條龍飛向天上，所以喺另一邊山上嘅Viewland望天橋立，就有「飛龍觀」嘅叫法。


喺山邊都有個智恵の輪，旁邊仲有好多「飛碟仔」(200yen三隻，喺手信舖買滿1000yen就送三隻)。只要將飛碟仔飛中個窿，就會帶嚟好運。


其實喺傘松公園有巴士上成相寺，不過今日太熱，唔想再行；而且行程緊迫，差唔多要返落山。唔知點解纜車站有箱甲蟲喺度。

纜車就係咁嘅樣，冇冷氣，亦都幾迫，都係搭返吊車(櫈)，睇下風景好過。

	開始有紅葉喇！

離開天橋立，向伊根出發。伊根係一個小漁村，d居民就住舟屋(船屋)，就好似香港嘅大澳咁。我地先去伊根嘅道之駅─舟屋之里，因為呢度喺半山，可以睇晒成個伊根。


		本來諗住喺度食晏，不過今日有伊根祭，所以好多人，咁就算啦！晏d先食嘢啦！手信舖有鬼太郎魚蛋。
揸架車落去伊根舟屋群睇下，不過冇位泊車，要揸到盡頭先有位。
	喺海邊嘅石上發現奇怪生物。隔離架車條櫻花呔軨好型呀！
不過呢度太遠喇！唯有揸架車兜下，就喺路邊泊低架車。今日有祭，應該冇問題嘅！同埋我地輪流落車影相，如有阻塞，都可以即刻揸走架車。

	伊根祭主要係有船喺度巡遊，相信佢地喺度準備緊。再駛遠少少望下先。


再駛前d，有個碼頭。不過見唔到船，只係見到蝴蝶。呢度d海水超級清，可媲美馬爾代夫。不過有人住就多咗d垃圾。

正想離開，俾我地見到有巡遊隊伍，即刻泊低架車，又影過。


	做乜你推住架麪包超人三輪車？原來後面仲有一班小朋友抬住個錢箱。

		到未呀？好熱呀！頂唔順喇！好啦！可以停低休息下，食杯雪糕先！

	呢兩個超級o靚模旋即成為眾龍友(好似係龍伯多d)嘅目標。又難怪嘅，佢地真係超級kawaii！


		學晒娜姐滴雪糕！其實呢個都好靚仔架！

再駛前d，又有一班人聚集，唔好執輸，又去裝下先。


	好多人影呢個伯伯，應該係大人物。仲有NHK新聞部嘅記者訪問老人家。做乜唔訪問我呀？我係外地遊客嚟架！

玩到好晏喇！真係要走喇！不過臨走前都要買d嘢！知道呢度有間向井酒造，佢釀造咗一支紅色嘅清酒─伊根滿開，梗係要買嚟試下啦！不過一路都唔得閒飲，要去到旅程臨尾嗰晚先有機會品嚐。
好肚餓呀！快d去下一站先得。
		本來諗住喺舞鶴市嘅一間食肆食岩蠔丼，不過差唔多過咗lunch time，咁就嚟道の駅舞鶴港とれとれセンター啦！
呢度同白浜嘅Tore Tore市場有d唔同，白浜嘅Tore Tore市場有個燒烤區，可以自己買海鮮，自己燒(又重溫下啦)。舞鶴嘅Tore Tore市場就有人燒埋嘅，你喺邊檔揀咗海鮮，就可以叫店員拎入去燒。我地嘅目標係生蠔，本來見到兩隻幾肥美嘅，不過睇得嚟已經俾人買咗。


唔緊要，佢都一路開好多隻出嚟！我地買嗰三隻都有手板咁大架！
		仲買咗甜蝦、魷魚同螺肉，正！
嘩！有賊呀！光天化日之下成條魚拑走咗！

	食飽就要起行喇！因為又有好長嘅車程。途經小浜市，呢度好出名架！留意下佢個英文名！
本來plan咗去余吳湖嘅，不過應該唔夠時間，就直接去長浜啦！但係一路都幾塞車，仲開始落雨，去到長浜都已經天黑，而且仲傾盆大雨，完全落唔到車，唯有直接去酒店啦！
我地住近江八幡嘅Hotel New Omi，又係去到已經係食晚飯嘅時間。今晚book咗食近江牛鐵板燒。

		今晚食嘅牛，有晒詳細嘅紀錄：幾時出世、喺邊度出世、期間搬過去邊、邊個負責飼養等，清清楚楚，食得放心。 (可click左面兩幅圖睇下)
	出面黑炆炆，都影唔到d乜，咁就自拍啦！

	頭盤係輕灸吞拿魚、大蝦伴南瓜mousse同埋燒牛肉。吞拿魚同大蝦不過不失啦！燒牛肉肉味濃郁，中心部分仍然嫩滑，好味。

牛尾湯非常足料，濃郁得嚟仲飲到蔬菜嘅鮮甜。如果係煮成清湯就更好。
	見師傅先煲飯，然後準備燒海鮮，有帶子同波士頓龍蝦。
		師傅先煎龍蝦，然後冚蓋煮一陣，跟住就煎帶子同龍蝦鉗。

三樣嘢都差唔多煎好，就上埋沙律。

師傅三兩下手勢就起好肉上碟。龍蝦肉鮮甜爽口，龍蝦膏甘香味美。坊間有d鐵板燒會將龍蝦膏起出嚟煮汁，不過我都係鍾意呢度嘅整法，將d龍蝦膏留返喺蝦殼度，原汁原味。帶子煎得啱啱好，中間仲係溏心，正！

師傅跟住就煎d趣怪嘢，除咗青瓜、秋葵同pancake仔，另外嗰兩樣我都唔知係咩嚟。紅色嗰舊冇乜味，爽得嚟有少少煙韌，有d似豬紅嘅質地，唔通係牛血？另外嗰舊又係冇乜味，有d似豆腐泡，可能係d腐皮製品。師傅講咗兩個日文名稱，我都唔知係乜，師傅話係呢度嘅特產。
	唔理嗰兩舊住，呢兩件先係我地嘅目標，前面嘅係牛柳，後面肥d嘅係西冷。

	呢件係牛柳呢件係西冷每款試一舊先，嘩！超級oishii呀！
牛柳嘅肉味好濃郁，肉質好腍，差少少就入口溶化，好彩仲有d咬口。西冷肥少少，肉味冇咁濃，不過d油脂甘香到不得了。完全唔駛點任何醬汁，只係加咗少少wasabi，帶起d肉味，perfect！
師傅亦好nice，幫我地影相。牛柳同西冷都食咗，淨返呢幾塊係咩嚟呢？↓

	見師傅快手煎好嗰幾塊牛肉，炒埋碟芽菜，飯亦已經煲好，可以開飯。師傅話嗰幾塊牛肉唔駛點醬汁，好！試下先。咦！甜甜地架喎！師傅話呢幾塊牛肉係用麪豉醃過，好味喎！用嚟送飯，一流！
「畢」埋煲底d飯焦，諗住脆卜卜，好正啦！點知一啖咬落去...黐牙嘅！仲要咁大舊添！好彩有麪豉湯，唯有整碗泡飯啦！
		食埋生果，飲埋咖啡，滿足！不愧為日本三大和牛之一，近江牛果然名不虛傳！
由於比較夜先嚟食飯，其他食客一早就走晒，剩返我地包場。
題外話：食嘢期間我地都睇下個menu，侍應非常細心，問我地駛唔駛要English menu，我地話唔駛，有漢字就ok喇！侍應都好健談，問我地喺邊度嚟，識睇漢字。我地話喺香港。佢問我地日文嘅漢字同香港嘅有冇分別，我地話大部分嘅意思都差唔多，不過都有d唔同。我就用「大丈夫」做例子，日文嘅「大丈夫」係「冇問題」嘅意思；不過中文嘅「大丈夫」係指strong man嘅意思，兩者有d分別。侍應話其實日文嘅「大丈夫」以前都係strong man嘅意思，係後來先演變成「冇問題」。就好似d拳擊比賽咁，拳手被人打中咗，為咗表示自己仲係strong man，就話「大丈夫」。有問題出現咗，為咗表示自己係strong man，應付到，就話自己係「大丈夫」，於是慢慢就演變成「冇問題」嘅意思。其實日文真係幾有趣，真係要俾d心機學識佢。