2013大阪

30/7/2013 (二) Day 6 大津 → 貴船 → 宇治
喺東橫inn食完早餐就出發。本來想去附近嘅賽艇場睇下，不過可能太早，未開門，唯有下次啦！
		見到有Aeon超市，梗係要去兜個圈啦！ Häagen-Dazs嘅雪糕就食得多，呢款Crêpe Glacée就未試過，見呢度賣得平，就試下啦！味道普通啫！試過就算。
跟住就去京都嘅貴船。本來去比叡山延曆寺會近d，不過book咗枱喺貴船食lunch，唔想太晏去到；加上去比叡山延曆寺嘅道路要俾錢，如果只係去一陣，又好似唔抵。睇下返落京都住嗰日會唔會搭車去啦！
車程大約一個鐘，因為要「橫斷」一個山頭。去到貴船嘅山腳有分岔路，左邊去貴船，右邊就去鞍馬。上貴船嗰邊嘅路係單線雙程嘅狹窄山路，又冇行人路。好彩我地去嘅時間尚早，冇乜車，亦都冇乜人。不過走嘅時候就人多車多，要褪嚟褪去避車讓人，所以揸車去嘅要小心d。
我地就係book咗呢間貴船ひろや去食川床料理。


		不過唔知個booking有咩問題，要等咗一陣。等候期間梗係周圍影下相先啦！

等咗一陣，終於入得去喇！侍應解釋咗一輪，當然我唔知佢講咩啦！笑一笑，點點頭，就算啦！穿過幽雅嘅庭園就去到門口，要除鞋先可以再入去。
		入到去，侍應帶我地行去後門方向。出咗後門，嘩！鋪晒紅地氈歡迎我地，唔駛咁客氣喎！沿住紅地氈行落去，就係川床喇！
由於京都係盆地，所以夏天嘅時候係特別熱嘅！而河川嘅地方就比較清涼，所以d人就喺河川上面搭起竹台，喺竹台上面乘涼。後來仲一邊乘涼，一邊食飯，就變成今日嘅川床料理。



		如果係紅葉嘅話一定好靚！不過「魚與熊掌豈能兩者兼得」呢！川床料理係期間限定，只係5月至9月先有，有紅葉嘅時候就冇川床喇！

我地係食川床懷石料理。懷石料理唔單止每道菜都好精緻，連餐具都好講究架！先附：辛子豆腐

圓碌碌嘅係豆腐，綠色嘅係秋葵碎，最上面嘅係海膽。放喺隻藍色嘅花型玻璃碟上面，淨係賣相已經相當吸引。豆腐好滑，好香豆味；秋葵碎有少少爽口，增強口感；海膽鮮甜味濃。三樣嘢各有特色，不過又互相配合，好味！侍應話個汁有d辣，不過食唔出辣味，再辣少少會更開胃。八寸：鮴時雨煮‧青梅鬼燈

鮴係嗰兜魚仔，日文係ゴリ，不過唔知中文係乜。時雨煮嘅「時雨」係指落咗一陣雨，即係比喻烹煮嘅時間好短。魚仔炸脆咗，再用醬汁煮返，甜甜地，脆卜卜，送酒一流。平時我係唔食梅嘅(梅酒例外)，唔鍾意梅嘅酸澀味。不過呢粒青梅用糖醃過，甜甜地，幾好味。

側邊仲有舊豚肉粽，匿埋咗嘅係山芋三文魚卷，仲有半粒醃漬過嘅葫蘆瓜仔，酸酸地，幾醒胃。小吸物：甘鯛霰揚げ

霰係「脆米餅粒」，霰揚係指炸嘢嘅時候，用脆米餅粒代替咗炸漿，所以舊炸鯛魚份外鬆脆。下面嘅係玉子豆腐，冇乜特別。反而我最欣賞碗湯，看似清淡如水，其實味道好清甜。向附：鯛‧鮪‧鱧落し

夏天係食鱧魚嘅季節，鱧魚其實即係門鱔。不過同魚唔同命，鱧魚喺香港只係普通貨色，通常斬件用嚟燜，甚至只係用嚟打成魚蛋；不過喺日本就係上等嘅食材。鱧魚嘅味道較淡，唔適宜點豉油食，因為會被豉油嘅濃味蓋過魚嘅味道，所以通常都係用少少梅醬嚟帶起魚嘅鮮味。另外，有時食刺身嘅時候會有一棵紫色嘅小花，好多人以為只係裝飾用，其實佢係紫蘇花，可以將d花放落豉油度，會增添一份清香。
呢個時候有另一枱客人嚟到，個靚女一見到咁優美嘅環境就好興奮，仲跳埋落去玩水添！
お凌ぎ：卷き素麪

夏日炎炎，食碗冰凍嘅素麪，實在透心涼。記得之前喺山形食過碗冷麪，入面係有西瓜嘅。見到呢碗冷素麪上面有粒橙色波波，自然覺得係蜜瓜波。不過一夾落去，軟腍腍嘅，原來係溫泉蛋嘅蛋黃(可能好多人分唔清楚溫泉蛋同半熟蛋，其實溫泉蛋係蛋白唔熟，蛋黃熟；而半熟蛋就相反，蛋白熟咗，蛋黃流心)。講返碗麪先，d素麪白滑如絲，入口柔滑細緻；冬菇、邊豆同鮮蝦非常爽口；蛋黃軟糯，蛋味濃郁。輕輕灑上細碎嘅柚子皮，感覺清爽怡人，冰涼嘅感覺足以令暑氣全消。煮物：冬瓜冷し餡掛け

原來日本人都會食冬瓜架喎！嚟日本咁多次都好似未食過，甚至未見過人食冬瓜。不過天時暑熱，食一舊清淡多汁嘅冬瓜，又幾舒服嘅！小芋煮得腍身粉糯；湯葉(腐皮)用上湯煮得入味。不過我始終都唔太鍾意一pet pet嘅玻璃芡。燒物：鮎鹽燒き


侍應將呢盆鹽燒香魚拎到嚟嘅時候，除咗「嘩！」之外，都冇第二個反應，簡直係一幅栩栩如生嘅圖畫。廚師竟然可以用鹽繪畫出咁有動感、咁立體嘅流水。淨係用眼望，都好似隱約聽到淙淙嘅流水聲，都好似感受到濺起水花嘅清涼感覺。兩條香魚串燒成「S」型，動感十足，完全感受到兩條魚逆流而上嘅堅毅精神。

將香魚放返上碟，配菜有茄子田樂、枝豆同葉地神(紅色嗰條，應該係薑類嘅嘢)。油物：とうもろこし掻き上げ

有炸粟米、炸魚仔、青椒仔同炸紫蘇葉。唔知嗰兩條係咩魚，不過有d似一開始嗰兜魚仔。炸粟米當然好味啦！鮮甜多汁。青椒仔比較平時食開嘅辣d，有d出汗嘅感覺，幾過癮！炸紫蘇葉其實幾好味，就好似食緊一片香味濃郁嘅薄脆咁。不過始終係索油之物，難免有d油膩。強肴：鱧落し

接近尾聲，都有d飽。今次嘅鱧魚係炸過嘅，再用醋煮返，所以酸酸地，消下滯，都唔錯。帶子、番茄同青瓜都感覺清爽，配埋酸酸甜甜嘅橙肉，戰鬥力又再次提升。ご飯：梅らりめんご飯止椀：赤出汁

臨尾就係澱粉質時間，係我地鍾意嘅魚仔飯。不過d魚仔唔係白色，而係紅紅地色嘅。食落酸酸味味，原來係用梅煮過嘅。「爬」多兩啖飯，發覺有種特別嘅香味，條脷仲有少少痲嘅感覺。睇真d，原來喺d魚仔度撈咗幾粒山椒，食落就更加惹味。水物：檸檬ゼリ一

最後食水果，有巨峰提子、西瓜同檸檬。西瓜清甜多汁；巨峰提子甜度極高，好耐冇食巨峰提子喇！強烈嘅香味實在令人懷念。望住成「kai」檸檬，心諗會唔會好酸呢？用叉拮落去，好有彈性喎！原來係檸檬啫喱嚟架！酸酸甜甜，好味呀！

呢度環境優美舒適(除咗要我呢個「鋼筋超人」坐榻榻米唔係好舒適之外)，聽住流水聲、風鈴聲，嘆住杯香濃嘅綠茶，真係hea到唔想走。
		走嘅時候，侍應仲送咗兩把扇俾我地。
記得拎個牌出去，攞返對鞋。
下一站係貴船神社，就喺呢度嘅斜對面。侍應都俾我地泊架車喺度，參觀完先返嚟攞車。


	呢度係繪馬嘅發祥地。
每逢去到日本嘅寺廟/神社，都會見到有一個架，上面掛滿一個個木牌，木牌上面就寫上祈求嘅願望，呢d木牌就係繪馬。以前d日本人認為神靈係騎馬嚟嘅，所以馬係神聖之物。每次祈福許願就用活馬做祭品，希望神靈保佑。不過用活馬做祭品實在太貴，於是就用泥土/木材嚟做馬(唔知「做馬」一詞係咪咁嚟嘅呢)代替，後尾就索性喺木板上面畫隻馬就算喇！於是就演變成今日嘅繪馬。

	繪馬有分黑馬同白馬(而家梗係冇分啦)：以前發生旱災嘅時候，為咗祈求有黑雲落雨，於是就用黑馬做祭品；相反大雨成災嘅時候，就用代表太陽嘅白馬/赤馬嚟祭祀。

除咗繪馬，呢度仲有另一樣嘢出名嘅，就係水占卜。只要買張占卜紙(200yen)，將佢放落水，d籤文就會慢慢浮現出嚟。


Oh No！係末吉添！唔緊要，掛起佢，唔好拎返屋企。


呢度蓋嘅印好特別，係有個靚女幫你蓋上紅印，然後用毛筆寫低水神貴船神社幾隻字，同埋日期，盛惠300yen。當時我冇帶印仔簿，所以冇蓋到印。返到嚟香港再搵返d資料，原來呢d叫朱印。以前d日本人去寺廟/神社參拜嘅時候，會寫低一d感謝經文供奉喺寺廟/神社，以祈求平安。後來d人會請寺廟/神社蓋上寶印，以證明去過嗰度祈福，慢慢就演變成呢d朱印。喺日本大部分寺廟/神社都有得蓋朱印，不過首先要買本朱印帖，應該喺寺廟/神社都有得賣，而且各有特色。好！下次再去d寺廟/神社嘅時候，就買本朱印帖，開始儲朱印。離開貴船神社，繼續向山上行。

本來嚟貴船其中一個目的就係食流水麪。不過成個貴船就只此一間(ひろ文)，而且冇得book位。plan行程嘅時候諗住早d嚟食，不過後來book到食川床料理，而且都有好味素麪，只係冇流水啫，咁就算啦！一路行，一路欣賞周圍嘅景色，其實幾寫意。


		只係得一兩棵紅葉，已經咁靚，如果秋天嘅時候，漫天火紅，一定好壯觀。
行到上頂，就會見到呢d參天巨木。再行前少少就到貴船神社奧宮。







其實奧宮冇咩睇，不過呢度靈氣迫人，d植物都長得茂盛過人。雖然行到有d攰，不過吸一啖清新嘅空氣，精神都為之一振。慢慢行返落去攞車，由於係食晏時間，所以多咗好多人，甚至有成車旅行團上嚟食嘢。
揸車去到分岔口，又轉去右邊嘅鞍馬睇下。不過唔可以揸車去到鞍馬寺，又要泊低架車，然後搭纜車上去。因為想早d去宇治，所以今次唔上去喇！

		離開鞍馬，揸返去京都市，人多車多。幾經辛苦，駛離市區，去到宇治川旁邊，即係就到喇！

今晚就係住呢間花やしき浮舟園，我地間房係河景房，有個小露台，可以望到十三重石塔。



極速影幾張相又出發喇！熱辣辣，有咩好得過去食碗刨冰吖！落去reception攞張地圖，咁啱有位男士喺度同reception姐姐傾緊計，應該唔係酒店職員，可能係相熟導遊之類。佢好好人，教我地去中村藤吉本店，仲話就夠鐘閂門，要快d去。我地揸車去，好快啫！去到中村藤吉本店，冇停車場嘅？停低喺對面先，叫老婆入去問下啦！原來要兜個圈，去返後面街就係停車場喇！






		我地叫咗一個A set，有抹茶雪糕、抹茶啫喱、紅豆蓉同白玉，仲配一碗冰凍抹茶。
另一個就要B set，有一壺抹茶要自己沖，有menu教嘅！
		原來沖茶嘅時候，水溫係好重要架！用熱水沖茶，就會飲到茶葉嘅濃香；用暖水就可以飲到茶嘅甘甜。
呢個B set，除咗有壺抹茶之外，仲有一碗刨冰。有抹茶糖漿同埋黑蜜糖漿，兩款糖漿都超級甜，不過配埋刨冰就啱啱好。
		呢度d抹茶食品/飲品真係好味喎！濃郁甘香。就算係墨綠色嗰碗抹茶，入口雖然苦澀，不過口感幼滑柔順，回甘香醇典雅，係我飲過最好味嘅抹茶。

襯老婆喺度買下紀念品/手信嘅時候，我就竄去宇治站蓋個印先。


揸返架車返酒店，然後就行下附近嘅景點。
		行過呢條喜撰橋就係中之島。中之島其實係兩個沙洲，大d嗰個係橘島；細小小，有十三重石塔嘅就係塔之島。
我地喺塔之島見到有間屋仔，入面養咗幾隻雀。行近d睇下，原來係鵜鶘(即係鸕鷀)，我地今晚睇嘅鵜飼，d鵜鶘就係住喺呢度。



		行過呢條朝霧橋就離開中之島，去到宇治川嘅對面岸。一落橋，旁邊就係源氏物語嘅雕像。 (源氏物語係日本經典嘅文學作品，可能係世界上最早出現嘅長篇寫實小說，內容主要係描寫宮廷中嘅情情愛愛。)

源氏物語雕像嘅對面，有一個鳥居，呢度就係宇治神社。
		名副其實嘅「兔」口水。



已經六點，宇治神社都閂咗門。再行前就係宇治上神社，係世界文化遺產嚟架！不過都係閂咗門，下次再嚟過。再向前行就係源氏物語博物館，不過都應該打烊，咁就唔行咁遠喇！

	沿路行返轉頭，可惜唔好天，如果唔係，有橋有水有夕陽，一定好靚。
行到塔之島，鵜鶘嘅屋企，竟然有隻鵜鶘逃走出嚟偷嘢食，然後就見到女鵜匠沢木小姐成籠鵜鶘拎出嚟。



原來鵜鶘捉魚之前都要食d嘢。咦？但係食飽咗，一陣咪唔捉魚囉？我諗又唔會餵到佢好飽嘅！食少少，吊佢癮，可能一陣仲落力。跟住就要將三籠鵜鶘搬落船。

我地都夠鐘落船喇！


		原來沢木小姐就係對面岸間屋度做準備。


準備好就出發，咁我地都開船喇！

隻艇開到適合嘅位置，沢木小姐就作最後嘅準備，亦開始放d鵜鶘落河。


旁邊d鴨仔亦好醒目，見到開船就自動游過嚟。

準備好晒，沢木小姐就開始講解喇！我地當然唔知佢講乜啦！
起初我地都覺得俾錢睇鵜飼，會唔會蠢咗呢？喺岸邊應該都睇到架喎！因為都見到有人坐定定喺度睇。不過開始咗之後，就疑慮全消喇！首先，d艇會開去遠少少嘅地方，兩邊岸係冇建築物嘅，即係唔可以喺酒店/餐廳度睇。其次就係我地d艇係會一字排開，咁沢木小姐隻艇就會圍住我地d艇，一路繞圈，一路表演。就算喺岸邊睇，都只係睇背脊，應該冇我地睇得咁清楚。今晚有四隻艇去睇鵜飼，我地隻艇排喺側邊，位置都唔錯！沢木小姐隻艇都兜咗四五個圈，我地都睇到夠晒皮。
開始天黑，鵜飼表演亦開始喇！











臨尾沢木小姐仲將d鵜鶘放近我地隻艇，等d鵜鶘可以同我地bye bye。

d鵜鶘就返去自己間屋仔，我地就返酒店食晚飯。 book酒店嘅宿泊plan時，揀咗鱧づくし。

我地嘅晚餐係喺房入面食嘅，不過唔係自己間房，而係隔離嘅房間。可能我地遲食晚餐，喺自己房食會阻住職員幫我地鋪榻榻米，所以我地要去借用山吹老師間房。



雖然係鱧魚餐，不過點少得呢條「S」型嘅鮎魚呀！




仲有紙火鍋，不過唔係淥牛肉，而係鱧魚shabu shabu。除咗魚肉，最特別係有魚春。不過鱧魚本身比較淡口，魚春都一樣冇乜味，全靠碗酸汁。

其實今日都幾攰，加上山吹老師間房冇電視，差d食到恰眼瞓，都係快食完沖涼瞓覺。
酒店有兩個溫泉，一個喺三樓(夜晚係女湯)，另一個喺地下(夜晚係男湯)。我落去嘅時候已經冇人，可以影兩張相。
		浸咗一陣就返上房，因為有私人按摩椅。呢幾日舟車勞頓，都幾攰。呢兩張按摩椅超掂！力度夠，準確度高，下下都揼中d酸痛位，簡直係回魂按摩椅。
其實呢兩張按摩椅唔係喺我地間房入面，只係喺正我地房門口，咁方便，同私人嘅冇乜分別啦！俾人揼咗一身，今晚一定好好瞓，早唞！