2/8/201 3 ( 五 )
Day 9
大阪
尋日晏咗去 阪急 ,又冇貨,今朝一早就去等開門。一開門,我一馬當先衝入去,去到個 counter ,見到有幾個新款,即刻一手一個攞住兩個先啦!點知其他人碌大隻眼望住我,原來係要攞籌嘅!唯有放返低兩個袋,去問 sales 姐姐攞張籌啦!不過個 sales 姐姐唔係好情願咁俾咗張 13 號籌我。
原來呢度每人限買兩個袋,今朝只係返咗 22 個袋,照經驗應該前面嗰 11 張籌已經會買晒今日嘅存貨,所以 sales 姐姐就唔想派籌俾我。不過前面有一家四口,攞咗四張籌,但係買唔到八個袋咁多,咁我地先有機會揀下 d 袋。不過已經剩返 d 唔靚嘅顏色,同埋一個閃紅色嘅新款,但係要成六萬幾 yen ,咁貴就唔抵買啦!唯有放棄啦!
但係我地思前想後,我地已經係喺門口排第一個衝入嚟架喎!點解會有人早過我地攞籌架呢?哦!原來我地喺遠 d 嘅門口等開門,仲有兩個門口好近個 counter 嘅!咁又要改變策略喇!聽朝就分頭行事,一人守住一個近嘅門口啦!
喺 梅田 逛一陣,就去食晏。 今日 book 咗 Fujiya
1935 ,貴為 米芝蓮三星 嘅餐廳,門面樸素簡約 ,好彩做咗功課,如果唔係真係行過咗都唔知。
比 預約時間早咗 d ,所以 被安排喺等候區坐住先。
呢度有個 藝術裝置 ,佢將d 水滴引落個藍色圓盤度,滴水就會轉向圓盤嘅中心,然後流走。
都幾得意吖!能夠喺一個寧靜嘅環境中,增添一點動感,但又不失高雅。
VIDEO
今日嘅 lunch
menu 。
隨後侍應就奉上冰凍花茶。
隻杯好薄架!薄到透光,非常精美。
夠鐘,侍應就帶我地入座。等候區嘅趟門一趟開,就係廚房,廚房入面嘅團隊見到有人客,都齊聲打招呼,士氣高昂。
跟住就到樓上雅座,坐喺貴賓房 ( 都係嘅,知道我地係遊客,一定係咁影相,困我地喺房入面,唔好騷擾其他人客 ) 。
用嚟裝抹手毛巾嘅木盒都好精緻。
嚟食好嘢,梗係要叫杯酒啦!侍應 推介 wine
pairing , 3000yen 可配五杯餐酒,就咁決定。
第一杯係 香檳 ,都幾「闊佬」喎!斟足半杯。
呢度嘅佈置簡約,以森林/大自然為主題,所以有石紋嘅裝飾碟,同埋原塊木材枱墊。
先嚟兩款餐前小食: 開心果棉花糖 同埋 紅蘿蔔 macaron 。香甜嘅棉花糖上面鋪滿刨碎嘅 開心果 , 開心果 刨得夠幼細,完全唔硬,反而有 d 入口溶化嘅感覺,過癮!輪 到 紅蘿蔔 macaron 喇!賣相同味道完全係一條 紅蘿蔔 ,只係冇咗 紅蘿蔔 爽脆,亦都冇咗 紅蘿蔔 嘅草青味。合埋眼去品嚐,就會食到一條鬆化、鮮甜嘅 紅蘿蔔 。
海棉寶寶?唔通大廚咁利害,連海棉都可以入饌?睇下 menu 先 : bread
of corn, a lot of bubbles ,原來係 粟米包 。拎上手,暖笠笠,未食落口都已經覺得美味。唔好見佢咁多窿窿,就以為佢輕飄飄,其實佢好墜手架!一搣開,軟綿綿嘅感覺,但又充滿彈性。一啖咬落去, 粟米 嘅香味就喺咀入面爆發,加上面頭嘅忌廉,簡直係飲緊一碗香濃嘅粟米湯。雖然質感似蛋糕,不過佢係我食過最好味嘅麪包。
日本人果然不時不食,夏天係食 鱧魚 同 鮎魚 嘅季節,不過估唔到連西餐都食得到。
今次嘅 鱧魚 係輕灸過嘅,上面幾粒係 炭燒吞拿魚 ,所以令到 鱧魚 都充滿焦香。黃色嗰兩粒係醃過、去咗皮嘅 茄子 。淺綠色嘅係 wasabi ,應該係冰咗/用液態氮處理過,不過完全冇 wasabi 獨有嘅香味,否則會更惹味。
跟住係一杯 有氣白酒 。果味濃郁,帶點酸味 ,唔會好 dry 。
侍應端上一個木盒,原來係 麪包 ,木盒底部有一塊熱辣辣嘅石板,侍應叮囑我地每次搣少少麪包,剩低嘅要放返入木盒保溫。 麪包 熱辣辣 ( 係熱到搣唔到嗰隻 ) ,脆卜卜,好味。
跟住係 燒鮎魚 。 鮎魚 燒得皮脆肉嫩,最特別係上面鋪滿「 青苔 」。其實 d 「 青苔 」係用 火箭菜 整成嘅醬汁 ,不過就冇咗 火箭菜 嘅苦澀味,味道清新,配合埋 杯 有氣白酒 ,剛好中和返 鮎魚 內臟嘅苦味。
平時食西餐,餐具會放喺兩邊,不過呢度就會放埋一齊。但係無論點放都好,都係叉喺左邊,刀/匙羹喺右邊。
今次竟然調轉咗......當然唔會擺錯啦!因為下一道菜係意粉,一般人都係右手揸叉食意粉,左手揸匙羹輔助。但係一般餐廳嘅侍應都係照平時嘅擺法,而呢度係少有會注意呢 d 細節嘅餐廳。 米芝蓮三星 ,果然唔係浪得虛名。
第三杯係意大利嘅 白酒 ,好香,不過比較 dry 。 口感柔滑,餘韻悠長。 而且用上 Riedel 酒杯,令 白酒 嘅香氣同口感發揮得更加淋漓盡致。
蝦肉意大利粉 。 意大利粉 係人手拉嘅,彈牙得嚟帶少少煙韌。用咗鴛鴦蝦: 鮮蝦肉 爽口鮮甜, 櫻花蝦 鹹香惹味。 意粉 彈牙, 蝦肉 爽口,配上粉糯嘅 蛋黃 ,平衡返個口感。
其實我有諗過如果用 蟹膏 / 海膽 代替 蛋黃 ,會唔會矜貴 d ?不過兩樣嘢嘅味道太搶,反而會破壞整體嘅和諧性。 ( 當然成本都係要考慮嘅因素 )
跟住係主菜,侍應擺放好餐具。呢把係 KAI
× Michel - BRAS 嘅 餐刀, KAI 係日本著名嘅廚具集團,旗下有刀具嘅名牌 旬 同埋 關孫六 。呢把 餐刀係同 米芝蓮三星名廚 Michel
BRAS 共同研製嘅刀具系列之中嘅其中一把,刀身有獨立編號,另一邊仲有 Michel
BRAS 餐廳嘅標誌 ( 佢係一棵香草,叫 cistre ,係法國南部 Aubrac 嘅高山上獨有嘅香草 ) 。
主菜係紅肉,自然要配一杯 紅酒 。呢杯都係意大利嘅酒,充滿果香。酒身適中,唔會太薄。入口幼滑,不過餘韻較短。
主菜係 煎鴨胸 。其實一向對 鴨胸 冇乜興趣,因為食過嘅都係又乾又嚡。不過呢度嘅 鴨胸 完全令我改觀,原來係我以前未食到好嘢啫!呢度嘅 鴨胸 係厚切,充滿肉汁。塊皮煎得甘香鬆化,好似燒腩仔層皮咁。本來有一壺焦糖醬汁,不過都冇乜用,食返鴨肉嘅原味已經好正!
喺度就睇到一把好嘅餐刀係點喇!夠鋒利,輕輕一拉,鴨肉已經齊口切開。唔會過份破壞肉嘅細胞,肉汁仍然可以保存喺肉入面。唔知點解去親鋸扒都係俾 d 有鋸齒嘅餐刀 ( 就係咁先叫「鋸」扒 ) ,其實好怕,鋸到 d 肉爛晒, d 肉 汁流到成隻碟都係,最恐怖就係仲有好多肉碎黐住喺把刀 d 鋸齒度,諗起都驚!
食完主菜,侍應就收拾好枱面,換上一塊幼滑嘅木枱墊。
到 咗 甜品 時間,第一道甜品係 西柚 。有 西柚肉 ,撈埋一 d 碎冰,仲有 椰子雪糕 ,黃色嘅係用西柚皮整成嘅 cream 。 西柚肉 同埋 d
cream 又苦又甘,好彩椰子雪糕夠甜,中和返。 d 碎冰 都係甜甜地,我估係用蜜糖整嘅。
第二道甜品係 桃 。夏天係食 桃 嘅季節,用嚟做甜品就最啱。呢個甜品入面有 桃味雪糕 , 新鮮桃肉 , 白色 嘅粉末係用 椰子肉 整成嘅, 紅色 嘅粉末就係用 raspberry 整成嘅。最特別就係 綠色 嘅醬汁,係用 羅勒 整成嘅。 羅勒 特別嘅香味,同 桃 香又幾夾喎!
仲有杯 dessert
wine ,係餐廳自家釀製架!仲有六種味揀: ( 左起 ) 梅 、 柚子 、 木瓜 、 枇杷 、 青檸 同埋 桃 。
我地揀咗 桃 同 青檸 , 桃 味好甜, 青檸 清爽 d 。
食完甜品,自然就係咖啡或茶。侍應拎嚟三款糖,淨係裝糖嘅器皿都已經係一件藝術品。最鍾意係裝蜜糖嘅水滴玻璃碗,線條簡單,不過又有幾滴水滴點綴下,平凡之中又帶點特色。
嚟到意大利餐廳,梗係要杯 Espresso 啦!老婆就要咗杯 Earl
Grey ,兩杯都好出色。
咁精彩嘅午餐, 米芝蓮三星 嘅午餐,才每人 6500yen (8 月啱啱加咗價,要 7500yen ,不 過都仲係合理價錢 ) ,加多 3000yen 配埋餐酒,都係 10000yen 有找,實在物超所值! Fujiya
1935 喺我嘅「最喜愛餐廳排名榜」係位列第一,有機會去 大阪 嘅朋友一定要去試下。
食完嘢,就去 天王寺 逛下,今次去 Q's
Mall 。
呢度 有好多舖頭,而且都幾啱行, 仲有 Time
Sale 添,銀包繼續流血不止!
Dé lices
du palais
行到腳跛,要搵個地方坐下。見呢間 d 果撻 幾靚仔,就試下啦!果然冇揀錯, d 生果幾新鮮,曲奇餅底亦好鬆脆。
出發前喺 一休 .com
book 咗兩間餐廳,呢間就係其中之一。
Ristorante Mangiare
( 已
結業 )
呢度其實係一個婚宴場地,樓上有埋教堂 ,好靚架!
我地 book 咗個晚餐,原價 10000yen , 一休 .com 做緊 Summer
Sale ,所以半價。
呢度嘅餐具托好得意,有幾個凹位,啱啱好可以放穩 d 餐具。
餐前小食係 蟹肉啫喱 。蟹肉鮮甜,魚湯啫喱味道濃郁,唔錯!
兩款冇乜特別嘅 麪包 。前面嘅係 香草包 ,後面嘅係 餐包 。好彩 d 橄欖油夠香,仲伴有少少鹽,更惹味!
頭盤係 鵝肝 。 鵝肝 煎得啱啱好,外脆內軟。仲有鴛鴦 無花果 ,一款係新鮮 無花果 ,另一款係用糖醃漬過嘅!
跟住係 海鮮意大利粉 。味道唔錯,不過意大利粉腍咗少少。
除咗意粉,仲有 意大利飯 。咁快就食澱粉質?好彩份量唔算好多。廚師仲攞埋粒 黑松露 出嚟,即場刨 d 黑松露碎 。 意大利飯 煮得煙韌有咬口, 黑松露碎 散發出淡淡土壤嘅香味,遇熱後,香氣更加撲鼻而來,好味!
侍應端上一個黑色嘅鐵鍋,打開個蓋一睇,原來係 煮魚 ,仲伴有洋蔥、番茄、露筍、煙肉碎等。切開舊魚試下,嚡嘅!仲有少少腥味添!其他配菜嘅味道都唔錯,但係主角唔掂,就扣晒分啦!
之後侍應換過另一套刀叉,係 Laguiole 嘅刀叉。 Laguiole 係著名嘅法國品牌,最具特色嘅相信都係佢隻 烏蠅 標誌。雖然好多人覺得冇理由用 烏蠅 做標誌,應該係蜜蜂。不過其實隻 烏蠅 係代表法國 Aubrac 嘅牛群用尾巴驅趕烏蠅嘅情景,都幾得意!
第二道主菜係 牛扒 ,不過又係麻麻地,又韌又有筋,完全係普通西餐廳嘅貨色。旁邊條 粟米 連衣上,賣相有 d 古怪,除咗證明到佢係新鮮粟米,我真係諗唔到仲有咩用。係墊底嘅茄子比較正常 d 。
跟住係 士多啤梨雪芭 ,都幾酸,消滯一流。
最後係 火焰布甸 ,冇乜特別。
Espresso
& Earl
Grey 。
呢餐真係唔掂,除咗環境唔錯,前菜幾好之外,主菜可以話係渣,特別係以日本嘅餐廳水準嚟計。好彩有半價,都冇咁「肉赤」。不過就冇下次喇!
今朝買唔到 BAO
BAO ,不過買咗兩件卷蛋,前面係 什果卷蛋 ,後面係 乳酪忌廉卷蛋 。
什果卷蛋 冇乜特別, 乳酪忌廉卷蛋 酸酸地,有 d 怪,都係原味好食 d 。