|
3/8/2013 (六)
Day 10
大阪
|
|
今朝有早餐食，就係之前個friend送俾我地嘅蕎麥麪。本來諗住拎返香港，不過呢包嘢都幾有份量，我地今次搭peach航空，寄艙行李得20kg，應該唔多夠用，唯有呢兩日解決咗佢。 |
 |
 |
|
 |
 |
 |
|
呢包蕎麥麪係半生嘅，都幾易處理。淥一陣，過冷河，就食得。都幾好味，口感煙韌，仲食到有d蕎麥碎。
食飽就去阪急，今次我地一人守住一個近BAO
BAO counter嘅門口。我嗰邊冇乜人，老婆嗰邊有兩公婆，男嘅係日本人，女嘅係泰國人，其實尋日已經見到佢地買咗幾個袋，今日又排過。老婆同佢地傾下計，原來佢地喺日本開按摩店，另外喺泰國有間水貨舖，佢就係喺度買袋返泰國賣。
一開門就衝入去，老婆嗰邊近d，老婆攞到1號籌，泰國人係2號，我係3號。我梗係同老婆一齊揀啦！我地揀咗四個袋，兩個老婆自用，兩個幫人買，任務完成...... |
|
 |
不過sales姐姐話唔得，因為泰國人係2號，應該揀先。老婆同泰國人都唔係好知咩事嘅時候，我一手搶咗泰國人張2號籌，然後俾返張3號籌佢。我就同sales姐姐話ok，sales姐姐都呆咗一陣，望一望泰國人。泰國人呢個時候先知道咩事，然後哈哈大笑，話我蠱惑。佢當然唔會介意啦！同sales姐姐話ok
ok，咁sales姐姐先肯收我地錢。 |
|
今次真係任務完成，可以去食晏，去返上次食過嘅但馬屋。 |
|
 |
 |
 |
|
 |
裝修咗喎！之前近玻璃嗰邊係幾張酒桶枱(右圖，上次嚟坐過嘅)，今次已經變咗卡位。 |
 |
|
 |
 |
 |
|
 |
今次塊牛扒好似渣咗喎！差唔多熟晒，仲有d嚡。下次唔駛再嚟！ |
|
今日冇特別行程，都係周圍逛。逛到去大阪站嘅三越伊勢丹，見到Pierre
Hermé。其實一早都知佢好出名，不過之前去東京嘅時候又安排唔到去朝下聖。後來終於都登陸香港，不過價錢似乎又貴，30蚊一粒macaron，完全超越晒心理關口，所以一直都未試過。難得今次有緣相遇，點都要幫襯下嘅！ |
|
 |
 |
 |
|
於是揀咗三粒macaron：粉紅色係佢嘅招牌玫瑰花味，不過比較淡，唔係好食到玫瑰花味。白色嘅係今期嘅限定品，綠色嘅都係佢嘅招牌，係橄欖雲尼拿味。
跟住逛到去Hep
Five，其實都好多舖頭啱行，不過都係嗰d品牌，之前都行得七七八八，咁就搵個地方坐下啦！行到上摩天輪嗰層，都有幾間甜品店幾吸引，最後都揀咗一間食waffle嘅，叫Colorful
Waffle。 |
|
 |
 |
 |
|
呢度有款窩夫係用鐵板上嘅，都幾得意，就叫嚟試下啦！起初以為係凍嘅鐵板，即係好似炒雪糕嗰種。不過一上枱，侍應就叫我地小心，塊鐵板好熱。真係熱喎！d朱古力漿流咗落塊鐵板度，即刻起晒泡，好似熔岩咁。至於味道方面，其實都想像係咩味啦！唔算好特別，OK啦！
|
|
經過便利店，見到Häagen
Dazs有另一款期間限定，係芒果橙味。比想像中好味喎！冇乜芒果味，不過橙味就好濃郁，有d似以前嘅蓮花杯。 |
 |
 |
|
跟住就返酒店梳洗，換過件衫，因為今晚又book咗一間米芝蓮餐廳，今次係二星嘅Hajime。 |
|
 |
 |
 |
|
我地喺門口影相嘅時候，侍應姐姐已經好警覺咁出嚟，睇下我地係咪book咗位，跟住就帶我地入去。我地喺等候區等佢核對返d資料，之後侍應姐姐問我有冇著外套，噢！冇留意dress
code添，我以為smart
casual就OK，點知原來要外套。不過侍應姐姐都帶我地入座，仲好細心咁攞咗件西裝褸放喺我椅背，真係非常體貼！
枱上放咗張卡，上面寫住希望食客能完完全全享受美食，加上要保障其他人客嘅私隱，所以唔准影相。咁就唯有將咁精彩嘅一餐，留喺心中，慢慢回味！大家想知係點就要自己去試喇！ |
 |
侍應姐姐就開始為我地介紹個menu，姐姐能操流利英語，經佢講完我地先知大廚嘅理念。說來慚愧，其實我地一直都睇唔明個menu，原來前面嗰幾頁都係大廚嘅理念，最尾嗰頁先係今晚嘅菜式。大家想睇下個menu，可以click以下嘅link：menu01，menu02，menu03，menu04。 |
|
每道菜都好精彩，最勁就係其中一道蔬菜。先問大家一個問題，你可以講出幾多種蔬菜(淨係蔬菜類，生果唔計)？我諗講到三、四十種都已經好利害，呢碟菜足足有九十種蔬菜，唔好話食，有d名睇完都唔知係咩嚟！另外，能夠裝到九十種蔬菜嘅碟，又係另一個勁！差唔多有12人大圓枱上面嗰個轉盤咁大！ |
 |
|
侍應姐姐全程都表現得好好，對每道菜嘅介紹都好清晰，空檔嘅時間亦主動同我地傾下計，服務一項絕對係滿分！
我地食到中段，見到有一家四口香港人嚟到，男的運動長褲polo裇，女的背心短褲，兩名小朋友(可能未讀小學)普通衣著，我同老婆都諗緊侍應俾唔俾佢地入嚟。侍應們商量咗一陣，都俾佢地入座。家姐仔都好醒目，叫細佬講嘢要細聲d。
不過老豆就開始同侍應姐姐有爭執，內容大致係佢地prepay(呢度喺book位嘅時候就要俾埋錢先)咗兩個大人餐，兩個小朋友可以嚟到先叫嘢食。侍應姐姐話冇兒童餐，亦唔可以散叫。不過老豆話佢秘書book枱嘅時候話OK嘅，佢秘書仲識日文，應該唔會搞錯。
擾攘一輪，老豆越講越大聲，仲話要報警，又話侍應姐姐嚇親兩個小朋友，唔要呢個姐姐招呼佢張枱，仲要問姐姐攞卡片，話要投訴人地。
之後大致平息咗，佢地用廣東話自己傾談。老豆話自己係唔知咩上市公司嘅CEO，阿媽同兩個小朋友講，唔應該以貌取人，佢地以為我地著得唔好，就唔想招呼我地，佢地都冇睇清楚我隻錶，等於佢地成年人工啦！點知個女竟然同阿爸阿媽講，唔好勞氣啦！食嘢啦！
侍應姐姐受完委屈，仲笑咪咪過嚟同我地講唔好意思，之前唔得閒招呼我地。我地先唔好意思，都讚姐姐處理得好好。
人地網頁有晒dress
code，去到高級餐廳有咩禮儀，大家應該好清楚，如果覺得唔滿意咪唔好食囉！身為咩咩CEO，都唔志在prepay咗嗰一萬幾千啦！唔好喺度為難d侍應啦！我地坐喺後面都覺得好失禮。
|
|
 |
 |
之後侍應姐姐繼續招呼我地，仲好好人咁送多一份甜品俾我地。埋單後，侍應姐姐送我地出門口，仲送咗袋嘢俾我地，真係好客氣，我地都唔係幾好意思收。
原來係一樽Tea
Jam。 |
|
有d人有錢有權就巴巴閉，完全都冇諗過要尊重人地。其實好簡單，你點對人，人地就自然點對你架啦！咁顯淺嘅道理，竟然係個女識，兩個大人就唔明白！當然唔係要貪人地嘅著數先要對人好，而事實就啱啱相反，係因為你對人好，人地有咩好嘢就即刻諗起你。所以，多d諗下其他人，世界都和諧好多。 |
