寰宇風情
Gundam大晒冷
1/8/2014 (五)
Day 11 博多
今朝一早起身，只係食咗包wasabi味嘅米百力支，就要出動！
今日係8月1日，每逢月頭都係BAO BAO返貨嘅大日子，要喺百貨公司門口等開門，然後衝去BAO BAO個counter攞籌，如果唔係就俾d水貨客掃晒d新貨。
每人限買兩個，我地用盡晒d quota，買咗四個。
本來都係陪老婆買，不過發現今期有個幾男裝款嘅，揹得咁型，唔買真係對唔住自己。
買完袋就上去九樓搵食，當然係去最愛嘅Paul Bocuse啦！
麪包微暖，外脆內軟。橄欖油香味濃郁，正！
平日有限定set lunch，有main course同甜品，才1500 yen。
main course我揀咗雞肉，雞肉有咬口，肉味濃郁。配埋濃厚嘅忌廉汁，連配菜都好好味！
老婆就揀咗海鮮意大利飯，意大利飯表面軟糯，米心仍然結實有咬口，非常正宗！蜆肉鮮甜，炸魚新鮮嫩滑，唔係急凍貨色，讚！
甜品老婆就揀咗呢度嘅名物Crème Brûlée，我就揀咗榛子mousse伴白桃雪芭，兩款都好好味！
仲有咖啡添！
平日食個tea都千幾yen啦！而家又main course又甜品，才1500 yen，物超所值！
返酒店放低d戰利品，然後就去天神逛下。
食唔到好味嘅伊萬里牛始終心有不甘，又上網搵下天神有冇邊度有得食啦！俾老婆搵到天神Parco有喎！
極味や
呢間極味や係人氣食店，無論任何時間都有人排緊隊。我地三點幾去到，都有十幾廿人排隊。平時就未必會排隊等，不過唔喺度等都係喺boutique門口等老婆買衫啫，咁就老婆自己去shopping，我就喺度排隊啦！
呢間係打正旗號食伊萬里牛嘅，d人都係食漢堡，燒肉要晚市先有。而且通常都係食set，有任食白飯、麪豉湯、沙律同雪糕。
價錢就視乎漢堡嘅大小而定，午市平少少，不過晚餐都只係貴100 yen。
雖然我都鍾意食生牛肉他他，不過舊漢堡幾乎係全生嘅，似乎又超出我嘅接受範圍喎！
唔駛擔心，鐵板上面有舊熱石，可以將漢堡放喺上面燒熟，生熟程度自己控制。如果舊熱石唔夠熱，仲可以請店員幫你換過舊。
老婆揀咗有蛋嘅，又另有一番風味！
炸雞200 yen有三舊，不過完全唔掂。
唔好以為任食嘅雪糕就唔掂，奶味濃郁又軟滑，追加！
食物very good，不過環境就迫咗d。而且非常彈油，紙圍裙都頂唔到咁多油，貴重物品最好搵個膠袋入好。不過個人冇得袋好，食後必定全身「香噴噴」！
Parco八樓有Tomica Shop，收到order要買一套特別版車仔，就嚟格下價先。另外新出咗金色林寶堅尼，又買一架啦！
有Transformer車仔，不過有號碼嘅唔係特別版，香港應該有得賣。
另外有兩款聽日先出，睇下有冇機會聽日嚟買啦！
繼續行到腳跛，行到去Solaria Plaza，就試下呢間洋麺屋ピエトロ啦！
唔係好肚餓，叫一個set，加一個pizza啦！
個set我地揀咗生火腿沙律同埋羅勒海鮮意粉。
pizza就要咗大蔥烤肉pizza，味道都唔錯！餅底好脆，不過脆到有d奇怪，似係炸嘅，唔似焗喎！
個set仲有甜品，睇menu張相仲以為係流心班戟添，原來只係落咗芒果汁，好彩都好味。
今日嘅收穫都算豐富。
天神嘅Bic Camera有好多正嘢，計上次嚟竟然見到十四代，今次又見到黑龍。
老婆就睇中咗支梅酒。
