寰宇風情
Gundam大晒冷
2/8/2014 (六)
Day 12 博多
之前去到鹿兒島都冇機會食鹿兒島黑豚,就喺博多食啦!
遊食豚彩いちにぃさん
炸豬扒肉質比較乾,炸粉有d「離罩」,唔掂!
反而老婆揀嘅黑豚野菜蒸就唔錯!薄切嘅黑豚嫩滑有肉味,肥肉爽口唔油膩,點埋個甜甜地嘅豉油汁,好味!野菜就咁蒸熟,原汁原味,感覺清新!
之前嚟過都覺得唔錯,不過今次有d失望,應該唔會再去。
食飽飽,落去下面嘅書局行下。
今次係有目的而嚟嘅,其實有本書好想買。之前都經過一d書店,不過已經冇貨,好彩呢度仲有,店員仲好好咁幫我包靚本書。
就係呢本《酩酊女子》,酩酊係飲醉嘅意思。呢本書係由十幾個單元故事組成,全部都以飲清酒嘅日本女子作為主角,當中應該有d鹽花,不過吸引我嘅就係佢會介紹返女主角飲過嘅清酒。
當中介紹嘅清酒都係我好想試嘅,例如呢支鳳凰美田。
呢款伊根滿開我飲過呀!係好特別嘅清酒,亮麗剔透嘅淡紅色,仿如一支Rosé,皆因佢係以赤米嚟釀造,所以味道亦都偏甜。
呢支鍋島嘅Harvest Moon我都想試,之前喺嬉野溫泉就試咗佢嘅Summer Moon,好飲!
跟住落去食品館行下。呢間Gâteau Festa Harada喺好多百貨公司都有,次次都見到大排長龍,難得今日冇乜人,就買包試下啦!
呢款麪包脆脆係人氣商品,果然好味喎!十級鬆脆,仲有沾有少少砂糖,甜甜地,係停唔到口嘅小食。即刻買多幾包,自用或者做手信都好吖!
呢款Sommelier以紅酒杯作為包裝主題,仲以為係紅酒味嘅麪包脆脆。後來店員解釋係用嚟送紅酒嘅麪包脆脆,唔理啦!又買包試下。
咬一啖試下,好濃嘅香料味道,係鹹食嘅麪包脆脆,果然係適合送紅酒嘅小食。原來加咗磨菇、洋蔥、豆蔻、黑胡椒、羅勒葉......所以味道複雜,又有層次,真係爭杯紅酒添!
尋日喺天神只係行咗好少地方,今日再戰天神!
今日有新嘅車仔推出,梗係去Tomica Shop睇下啦!
雖然呢兩款遲下香港應該都有得賣,不過而家見到就買咗先啦!
尋晚問咗d知情人士,原來呢架金色林寶堅尼喺香港都炒得好貴,呢度仲有大量存貨,就買多幾架啦!
我地買咗十幾架車仔,店員好好咁搵個大盒幫我入起晒。
架金色林寶堅尼果然好型喎!
又差唔多逛到晚飯時間,咁就逛去Solaria Plaza,睇下有咩好食啦!不過冇咩吸引。
正諗緊仲有咩好食之際,老婆就被呢班臭屁桃嘅黨羽擄走。而家呢個世代,當然係影完相先救人啦!
嚟到九州,食唔到好味嘅黑豚,硬係覺得爭緊d嘢!於是就上tabelog,睇下附近邊度有得食黑豚啦!
就係被呢碟黑豚花吸引,雖然冇評分,亦只係得兩個回應,不過唔理喇!搵食係要有冒險精神嘅!
花みずき
呢d隱世小店當然唔喺大街啦!我地由天神地鐵駅,沿地下街行到天神南地鐵駅。然後上返路面,沿大街國体道路一直行。過咗若宮神社,第三個路口(有間Lawson),就轉入去。
(可按右圖放大地圖)
行多少少就見到有間藥局,呢度就係今泉セントラルビル,門口掛晒燈籠,亦有好多廣告板。
搭升降機上三樓,呢度係一梯一伙,應該唔會搵錯。
掛咗牌,營業中,就入去睇下啦!
其實未夠六點,所以未有其他食客,亦只得老闆一個喺度準備食物。
餐廳窄長,一邊係吧枱,一邊係table。
九州係燒酎之鄉,所以呢度都放滿多款燒酎,而且全部都掛咗名牌,似乎呢度都係做熟客生意。
呢個時候侍應姐姐先啱啱返工。
嚟到九州,當然飲燒酎啦!呢度冇幻之燒酎,見呢支甕伊佐錦好似好勁咁,喺甕壺貯藏咗三年,就試下啦!一斟出嚟已經聞到好香,飲一啖,味道剛勁強烈,慢慢流到去喉嚨深處,又變得醇和豐厚,完全唔嗆喉,好飲!老婆揀咗梅酒,顏色偏橙色喎!飲落有蜜柑香味,原來揀咗蜜柑梅酒,都好飲!
呢度唔係食鹿兒島黑豚,而係食糸島雷山豚。
糸島係喺福岡縣西面嘅一個半島,不過唔係咁出名,所以大家可能冇聽過。
睇menu有燒豬腳,即叫!事原早幾晚睇電視,播緊第四季嘅《孤獨的美食家》,五郎就係食緊燒豬腳,見佢食得咁滋味,梗係整隻試下啦!
不過非常後悔......後悔只係叫一隻咁少。簡單嘅鹽燒,非常惹味。豬腳富膠質,豬皮爽口,送酒一流!不過製作需時,費事又麻煩老闆再燒多隻,所以唔追加喇!
今期推介有茄子田樂燒,肥大肉厚嘅茄子鮮甜多汁,加上惹味嘅麪豉醬,即刻清咗!
主角出場,唔駛多講,同張相一樣咁吸引!呢度係二人份量。
原來呢碟豬肉花有兩個唔同嘅部位,中間肥d嘅係豬腩肉,圍邊瘦d嘅係里脊。
雷山豚肉味十足,絕對同鹿兒島黑豚有得fight。豬腩肉嘅肥肉爽口,里脊唔肥,不過都唔韌。點咗芝麻醋,更加美味!食咗幾片,已經忍唔住要追加一份。
等候期間,炒碟大蔥豬肉送下酒先。大蔥同豬肉其實係好夾嘅,不過唔鍾意佢用玻璃芡收尾。就咁炒到乾身,有d鑊氣咁,應該更好味。
見呢支黑島美人都好多人開喎!又試下先,
口感都幾清爽,用嚟配嘢食都唔錯。
老婆見到poster promote Soba Soda,又叫嚟試下。其實係蕎麥燒酎加梳打,淡口d,有氣易入口,啱晒佢。
呢度一人份量,都唔少喎!繼續shabu shabu!
飲飽食醉,盛惠9000 yen,唔算好平,不過絕對物有所值!
搵食多年,跟旅遊書/食評人嘅介紹,搵到好嘢食,當然開心啦!不過全靠自己,搵到一d隱世美食,滿足感更大!
返到酒店仲有甜品。呢個蜜瓜之前食過,唔多介紹喇!
呢個堂島roll係博多阪急店嘅限定品,佢係紅茶roll,蛋糕度仲有茶葉碎,好清香,好味!
聽日就要返香港喇!今晚要執行李。