拉麪大比拼

雖然一直對拉麪嘅興趣都不大，不過有時諗唔到食乜，簡簡單單去啜碗麪都唔錯！今次就試咗兩大拉麪店：一蘭同一風堂。

一蘭 (天神西通店)

環境唔駛多講，自修室格局，都幾迫。不過拉麪真係唔錯！湯底香濃，唔會太油膩，亦唔會死鹹。麪質煙韌，有咬口。叉燒肥瘦均勻，肉質軟熟。

一風堂 (博多駅店)

環境當然比一蘭好得多，亦有醃製嘅配菜任加。不過主角拉麪就麻麻地，麪質比較稔，湯底亦好油，最後飲唔晒碗湯。

所以拉麪大比拼嘅勝出者係一蘭拉麪！

和牛大比拼

九州有好多出色嘅和牛品種，除咗比較出名嘅宮崎牛同埋佐賀牛，其實仲有好多其他品種，今次途經嘅地方如果有和牛，我都盡量試試，作出比較。

(不過和牛嘅部位唔同，烹調嘅方法又唔同，唔能夠好公平嘅去比拼，所以純屬個人意見。)

豐後牛

豐後係別府古時嘅稱呼，所以豐後牛即係別府出產嘅和牛。今次試嘅豐後牛係溫泉旅館嘅夕食，係燒牛扒。肉質肥美，以炭火燒烤，油脂甘香，不過稍欠肉味。

阿蘇赤牛

阿蘇赤牛係喺阿蘇火山放牧嘅和牛，所以唔會好肥，肉質比較結實，而且肉味濃郁。今次食嘅係牛肉丼，喺日本真係好難食到要咬嘅牛肉。其實肉質都算軟熟，只不過唔係入口溶化嗰隻。

高千穗牛

其實對高千穗牛嘅期望都幾大，因為高千穗係喺宮崎縣，即係高千穗牛其實都係宮崎牛嘅一種。而且年年獲獎嘅宮崎牛當中，有d真係產自高千穗，所以呢度嘅和牛都係冠軍級架！今次嘅牛扒以鐵板上，長時間用鐵板熱住，令牛扒過熟。加上肉質本身欠佳，實在大失所望！

宮崎牛

今次返到宮崎市，搵咗間專食宮崎牛嘅鐵板燒，總算冇甩拖！宮崎牛嘅脂肪比例均勻，入口溶化。難得仲食到濃郁嘅肉味，不愧為日本no.1嘅和牛。

鹿兒島黑牛

呢次去到鹿兒島，喺溫泉旅館食到鹿兒島黑牛，今次係shabu shabu。牛肉唔肥，有咬口，肉味都算濃郁，不過唔夠鮮味。

佐賀牛

專登由博多搭新幹線去佐賀嘅季樂本店食佐賀牛，牛肉嘅脂肪比例均勻，呈雪花狀。以陶板燒烤，焦香味美！可以媲美宮崎牛。

伊萬里牛

一般嘅伊萬里牛都係用嚟整漢堡，今次就試過用伊萬里牛嚟shabu shabu，肉質唔夠嫩滑，肉味偏淡，唔掂！好彩之後去食伊萬里牛漢堡，由於牛肉唔係完全剁碎，仲食到細細片嘅牛肉，反而幾好味喎！可能係醃過嘅關係，加上接近全生，然後自己燒熟，食法完全補救咗牛肉嘅缺點，唔錯！

小弟條脷唔係「金舌頭」，其實分唔到邊種牛打邊種牛，只係憑當時嘅感覺作判斷，然後再作出比較。宮崎牛同佐賀牛真係明顯好食d，不過要我分呢兩種邊種好味d，我又分唔出喎！不過點都好啦！有機會食到已經好唔錯！

溫泉旅館大比拼

今次嚟九州，都book咗幾間溫泉旅館，又簡單比較下啦！

山紫御泊處 花之舞

喺由布院有三間好出名嘅溫泉旅館，合稱「御三家」，不過佢地嘅價錢亦都出名貴。所以退而求其次，搵間價錢合理嘅！

房間嘅私人風呂唔係好大，不過有園林美景，環境都幾優雅。食物方面都好出色，整體上值得推介。

やすらぎの四季の宿　吉田屋

嬉野溫泉係比較冷門嘅旅遊地點，所以旅遊資訊都比較少。呢間溫泉旅館都係喺Google Map亂咁揀而搵到，都唔駛多解釋，係小弟心目中no.1嘅溫泉旅館。