寰宇風情
Gundam大晒冷
3/8/2014 (日)
Day 13 福岡 → 香港
今朝有咖啡飲，其實呢兩罐咖啡係喺街派嘅試飲，都唔錯喎！
Paul Bocuse
有平靚正嘅嘢，唔怕encore多一次啦！
不過今日係星期日，冇平日限定嘅特價set lunch，最平都要1900 yen，就多咗碗湯。
呢碗薯仔凍湯好綿滑，飲落透心涼，啱晒夏天飲。
主菜有魚或者雞，其實呢度d魚都整得唔錯架！上次嚟食過嘅煎魚，簡直係藝術品一樣。
見隔離枱叫咗魚，不過唔係好吸引，都係食返雞穩陣d。
我就揀咗個貴少少嘅set，2500 yen，就有前菜嘅。
前菜係八爪魚茄子沙律，八爪魚軟糯唔韌，好味。
睇menu，主菜係ホロホロ鳥，都估到係雞嘅一種。見埋真身，咁大塊雞胸，估計應該係火雞(後來查返原來係珍珠雞)。
咁大塊雞胸都好嫩滑，完全唔韌，好嘢！
甜品都係上次嗰三款，老婆好專一，都係揀Crème Brûlée。不過今次似乎燶咗d，要扣分。
我就試新嘢啦！椰子meringue加雲尼拿雪糕伴菠蘿配芒果汁，其實唔知叫咩名，總之係呢幾樣材料啦！雖然好多嘢，不過每樣嘢都配合得好好，好有夏日嘅氣息。
執好行李，準備check out。
不過都要表揚下個雪櫃，呢個可以話係我見過最夠凍嘅雪櫃。平時嗰d仲要自己攞兩杯冰「加凍」，呢個勁到跟cake嗰兩包冰，雪咗幾日都未溶過，讚！
去到機場，寄好行李，又去搵食。
ぎおん亭
呢度個炸豬扒都唔錯！
豬肉生姜燒都好正！d汁好惹味，用嚟撈飯，一流！
之前買咗罐菠蘿酒都未得閒飲，而家食飽飯飲就啱晒！都幾香菠蘿味，唔會太藥水味，唔錯！
過咗關，梗係去Duty Free掃貨啦！
呢支久保田碧壽喺香港city super賣三百蚊，而家差唔多平一半。
之前喺霧島酒造都見到呢支燒酎，不過冇買，因為喺街都有得賣，相信DFS都有，而且仲免稅添，應該最平，果然冇錯！
另外，呢甕燒酎都係喺香港city super有得賣，而家又係差唔多平一半。
因為打風，好多班機都delay。其他航空公司要派coupon，小食店d嘢食同飲品都俾人掃得七七八八。
我地班機只係遲咗半個鐘左右，都算係咁喇！
