係咪好恐怖呢!第一次炒車,仲要係total
loss。不過超好彩,兩個人都冇乜大損傷。
喺日本嘅小鎮(其實都唔知喺邊度)炒車,亦係好彩,
d警察都唔想麻煩(加上我地係遊客,又溝通唔到),
只要人冇事,冇人追討賠償(我地租車嘅,保險公司會搞掂),
快快手拖走晒d車,唔好阻塞交通就得喇!
如果喺香港就大鑊,又要吹波波
(其實晚飯時飲咗一杯啤酒,不過係唔影響我嘅判斷能力,但唔知過唔過到吹波波呢?),
又要落口供......肯定超麻煩。
再好彩嘅就係,我只係賠咗50000yen(約港幣5000蚊)。
後尾再睇清楚租車公司嘅條款,如果有交通意外,
架車有損毀(包括撞凹、刮花等),但仍可以揸返目的地還車嘅,要賠20000yen;
揸唔到返目的地還車嘅,要賠50000yen。
少少刮花都要賠2000蚊,我total
loss都只係賠5000蚊,好彩!
(加上架車係差唔多全新架!只係行咗二百幾公里,就俾我KO咗!)
事後諗返都覺得超級好彩,我係直撞埋去,個車頭拗晒,食晒d力,
加上有air
bag頂住,個人先冇事。
如果我揸快d或者佢轉彎慢咗,就係佢攔腰撞我司機位嗰邊,咁我就死梗!
旅程嘅得著
其實嗰日揸車嘅感覺都唔係太好,又入錯電話,又行錯路。
我地可以喺同一個地方兜咗五六次,硬係唔可以順順利利去到outlet同埋晚餐嘅地方,
梗係架黑色車累事啦!黑住晒!真係唔好彩!
最衰係嗰個司機亂轉彎,搞到我撞埋去。
仲要第一日到埗就炒車,咁之後嘅行程點算呢?真係唔好彩......
其實個人冇事已經係最好彩!
我地成日都覺得不如意嘅事係唔好彩,其實可能已經好彩咗,
如果真係唔好彩,可能唔止衰成咁。
好似我地去到長崎食石頭魚咁,嗰度只係得兩款套餐,一係大魚,一係細魚。
我地一場去到,梗係兩個都要大魚啦!
點知嚟到都係一條大一條細,我地仲覺得d日本人學壞咗,兩條撈埋一齊就以為我地唔知。
之後個侍應過嚟同我地傾計,問我地條魚好唔好食,仲指住條大魚話very
big。
原來嗰條細魚已經係大魚餐嘅size,真係細魚餐嘅魚仲細d。
師傅見我地係遊客,專登搵條加大碼嘅魚俾我地,只係我地小人之心啫!
其實只要凡事都向好嗰方面諗,相信個人會開心d,個世界都會和諧d。
不過香港嘅節奏咁快,一切都係功利行先,
加上性格使然,樣樣嘢都覺得唔順眼,相信都唔係咁容易改得到。
不過盡量啦!我會成日提住自己所有嘢都係好嘅!
今次執返身彩,亦發現生命嘅脆弱,我要更加保重自己嘅身體,同埋珍惜身邊嘅一切!
|