寰宇風情
Gundam大晒冷
29/7/2014 (二)
Day 8 鹿兒島 → 博多
尋晚還咗車,今日就搭JR返博多。
其實第一日嚟到九州,已經喺博多駅嘅綠色窗口買好三日北九州Pass。
另外,出發前喺網上預約咗三班特別列車,都可以喺綠色窗口攞埋飛。
喺我嘅預備篇都提過我book錯飛,就係由人吉去熊本嗰程,我只係book咗人吉去新八代,因為由新八代去熊本,我見搭SL人吉號比較慢,我諗住可以用pass搭特急,所以就冇book到去熊本。
跟住我用pass book新八代去博多嘅飛,職員話「打咩」,原來北九州Pass唔包新八代。於是即刻問佢可唔可以改由人吉去熊本,好彩有位,補錢就得喇!
咁就用pass book熊本去博多嘅飛啦!終於搞掂晒!
早上嘅摩天輪。
喺東橫inn食埋早餐就出發。
鹿兒島中央駅
駅入面嘅玻璃壁畫好靚呀!
幾時可以試晒鹿兒島嘅燒酎呢?
特急隼人之風嚟喇!
隼人之風只係得兩卡,我地坐嘅一號車係指定席,唔係好多人。指定席以淺嘅木色佈置,比較光猛醒神。
二號車係自由席,以深嘅木色佈置,感覺懷舊復古。
小朋友可以填色。
乘務員就準備緊賣紀念品。
仲有天窗方便乘客睇風景。
本來想買火車便當,不過掛住影相,轉個頭已經賣晒!
過咗大約一個鐘,就去到第一個可以落車遊覽嘅車駅─嘉例川駅。
嘉例川駅係其中一個最古老嘅車駅,有過百年嘅歷史。
買唔到便當,就買個蜜瓜包啦!
呢個蜜瓜包好新鮮架!當架火車駛到去霧島溫泉駅,麪包店嘅職員就成袋麪包攞過嚟月台,交俾乘務員,然後賣俾我地。
大隅橫川駅
呢個都係最古老車駅之一,同嘉例川駅一樣,都係過百年嘅木製車駅。
過多一陣就去到總站吉松駅喇!
要等40分鐘先轉下一班車,不過附近冇咩行,都係周圍影下相啦!
伊三郎 新平號嚟喇!原來由人吉去吉松方向嘅就叫伊三郎號,相反由吉松去人吉嘅就叫新平號,所以我地呢班係新平號。
有咗上一班車嘅經驗,襯冇乜人就即刻入去攞道具影相。
新平號嘅車廂比較懷舊。
觀景嘅位置係企位。
除咗北海道嘅幸福駅,呢個真幸駅(真正的幸福)都好受歡迎架!
呢d咁幸福嘅車站,一定有幸福之鐘啦!
呢條鐵路有個特別嘅地方,由於鐵路係要上山嘅,火車唔可以上太斜嘅山路,又唔想圍住個山兜圈行,所以呢度有幾段路都係成「之」字形,即係架火車要駛前d,再用尾行先,轉另一條上山嘅路軌。
要調轉行嘅時候,車長就要好匆忙咁由車頭走去車尾開車。
我地頭先就停喺下面嘅真幸駅,而家調轉行,又駛高咗一層。
呢度另一特色就係呢隻日本三大車窗!
哈哈!當然唔係講隻窗有幾特別啦!而係講窗外嘅風景!
喺呢度會睇到蝦野盆地,霧島連山,天氣好仲可以睇到櫻島火山添!
不過今日大霧,睇唔清楚d山。
由於睇到三大車窗嘅位置唔係好大,所以有三卡嘅新平號就分別停咗三次,務求每卡嘅乘客都可以欣賞到美景,非常細心!
網上book位有個好處,就係電腦會揀最好嘅座位。起初我都奇怪,點解係5A同5D,唔係一齊坐嘅?唔通冇位?原來佢劃晒兩個窗口位俾我地。
我地仲好衰咁嫌玻璃反光,開咗隻窗嚟影相。梗係啦!人地咁好安排兩個窗口位俾我地,作為報答,我地當然要用最佳嘅方法嚟欣賞啦!
偷拍 vs 自拍
矢岳駅
呢度有攤檔賣特產,個個都買盒梨,我梗係唔執輸啦!
梨肉清甜爽口,冇得頂!
又見到「之」字形路段,一陣就會駛落去。
呢度係一個270°環迴落山路段,環迴到「之」字形路段,就會用車尾褪入車駅。
大畑駅
きじ馬係日本傳統嘅鄉土玩具,細隻嘅可以拖住嚟轆,大隻嘅可以騎埋上去轆。
個站俾人貼滿晒卡片。
其實鐵道遊都唔見得好悠閒,每個站只係停五分鐘,又要蓋印,又要影相,仲趕過跟團。
大約13:05去到人吉駅,不過要14:38先轉下一班車,仲有個幾鐘,梗係去搵食啦!
上村うなぎ屋
呢間係食鰻魚嘅老店,已經有過百年嘅歷史,仍然遵照傳統,堅持以人手炭燒鰻魚,所以d鰻魚特別香脆,亦多咗一份焦香。正!
之前揸車,都冇乜機會見到坑渠蓋,喺人吉終於見到d有特色嘅坑渠蓋。
人吉駅
SL人吉號原來一早已經喺度等緊,差唔多夠鐘就褪後駛入月台。
呢d舊式嘅蒸氣火車好受歡迎,而且一日只得來回各一班車,所以一定全車爆滿。
加上全車指定席,一定要預約車票。
呢部蒸氣火車頭係堅架!真係燒煤產生蒸氣,用蒸氣推動火車!
老婆第一時間已經上咗車,霸定車頭個觀景位。
第二時間就梗係攞道具影相啦!
車尾嘅觀景位比較開揚,冇俾蒸氣火車頭遮住。
一勝地駅
呢度個名咁好意頭,所以好多人喺呢度買個必勝護身符。
每逢可以落車遊覽,乘務員都會幫乘客同列車影相。之前兩班車嘅乘務員都好醒,攞晒道具。不過呢班車嗰個冇攞,唯有自己嚟啦!
列車一路沿住球磨川旁邊行駛。
車上有一團日本人旅行團,我見個領隊攞咗幾十張記念乘車証,然後狂蓋印。
我問乘務員仲有冇記念乘車証,佢先好唔願意咁攞咗兩張俾我。
白石駅
其實每次停站,都係我同另外兩三個人搶閘衝去蓋印。今次我一馬當先去到,點知呢個站係冇印嘅,於是去路軌影相。然後先見到其中一個蓋印人跑緊去,於是我就好心話過佢知no stamp啦!佢都有d失望。
返上火車,乘務員就攞雪糕出嚟賣,有燒酎味喎!正!
要過河喇!火車駛過球磨川第一橋樑,超過一百年歷史架喇!
坂本駅
都係冇印,咁就去影火車啦!停咗幾個站,大家都影到唔影喇!我地可以獨霸火車頭!
當SL人吉遇上Aso Boy。
差唔多去到熊本,竟然遇上Aso Boy,可以話係將全車嘅興奮程度推至高潮!我相信對面嘅乘客都係一樣,不過佢地勁d喎!有晒心心牌!
去到熊本,有十分鐘時間轉車。
我地搭Sakura 566號去博多。
座位扶手有個放杯器,設計簡單,既美觀,又實用。
返到博多,去JR博多城搵食,喺二樓見到間意大利餐廳都幾多人氣,就試下啦!
Andersen
叫咗番茄Mozzarella,其實侍應拎嚟嘅時候係有倒塌嘅跡象,咁要影相就梗係擺返正啦!賣相唔錯,不過味道普通啦!
仲叫咗意大利火腿拼Iberico豬肉腸,意大利火腿唔夠鹹香,估計風乾嘅日子比較短。Iberico豬肉腸直頭唔掂,好似食緊紙皮咁!反而個麪包籃係全晚最出色嘅一道菜。
前菜都唔多掂,無謂叫主菜啦!埋單,轉場!
話晒九州都係拉麪嘅發祥地,就去食拉麪啦!
記得樓上10樓有一風堂,就去試下啦!
其實之前香港啱啱開一風堂嘅時候都試過一次,不過感覺上普普通通啦!多年後嚟到九州食,感覺都係一樣,麻麻地啦!
佢嘅麪質稔得嚟粉粉地,有d似蕎麥麪嘅感覺,唔係我鍾意煙韌彈牙嘅口感。另外,個湯比較油,豬骨味唔夠濃郁,整體上同一蘭爭好遠喎!最好味只係隻蛋同餃子。
應該喺JR站有儲印活動,不過唔知有咩禮物呢?