|
都好耐冇返國內旅行喇！對上一次已經係2008年去九寨溝。如果唔係今次跟公司去山西交流，我諗我都唔會專登plan去。其實之前對山西係完全陌生嘅，只係知道山西竹葉青，同埋刀削麪(都係飲飲食食嘅嘢 )。我地去咗六日，頭一日半係公務，之後嘅四日半就係考察(好鍾意呢個terms，可以名正言順咁去玩 )。
山西位於華北一帶，喺太行山嘅西面，因而得名。山西簡稱「晉」，因為係春秋戰國時代，晉國嘅所在地。山西係華夏文化嘅發祥地之一，擁有好多古遺跡，所以喺中國流傳一種講法：十年風景看深圳，五十年看上海，百年看北京，千年看陜西，三千年看山西！山西嘅文化歷史悠久，已經有三個地方被列入「世界文化遺產」：平遙古城，雲岡石窟，同埋五台山(本來行程係去晒三個地方嘅，可惜五台山整路，上唔到去 )。另外亦有好多出名嘅景點：懸空寺、壺口瀑布等。
出名嘅歷史人物都唔少架：廉頗、藺相如、關羽、呂布、貂蟬、武則天、狄仁傑、楊玉環、白居易、柳宗元......
山西人嘅主食係麪，最為人所知嘅係刀削麪。其實刀削麪只係山西人做麪嘅其中一種方法，用金屬片嚟削麪團。後來仲加入表演嘅成份，把麪團放喺頭頂嚟削麪、踩住單輪車嚟削麪等。另外，山西人最鍾意呷醋，唔係男女之間嗰種，係每次食飯都必定有一碟陳醋，所以山西嘅陳醋都好出名。至於酒類，山西嘅汾酒亦係中國名酒之一，我地熟悉嘅竹葉青，就係以汾酒做酒底，再加入竹葉釀製而成。
好喇！唔講咁多，出發啦！ |
